აშშ-ის ხორბლის ფერმერებს გვალვა და გეოპოლიტიკური ქაოსი უქმნის საფრთხეს

თუმცა პურისთვის განკუთვნილი ხორბლის ფიუჩერსების ფასი 39%-ით გაიზარდა, ნილსენი კი დარწმუნებული არ არის, რომ გაძვირება მის მოგებას გაზრდის. ტრაქტორისთვის საჭირო დიზელის ფასი რეკორდულ ნიშნულზე ავიდა. ამას ემატება არასტაბილური ამინდი, რომელმაც გაზაფხულზე ხორბლის მთელი მოსავალი დააკარგვინა. სამხრეთ დიდ ვაკეებს კი გვალვა მოედო.

ნილსენმა თქვა: „ჩვეულებრივზე მეტი ხორბლის დათესვას არ ვაპირებთ. შესაძლოა, იმდენიც კი არ დავთესოთ, რამდენსაც ჩვეულებრივ ვთესავთ. არ ვიცი. მართლაც უნდა დაველოდოთ და ვნახოთ, როგორი ამინდი გვექნება“.

მაღალი ხარჯების, ცუდი ამინდისა და გეოპოლიტიკის ერთობლიობა აშშ-ის ფერმერებს გაურკვეველი სასოფლო-სამეურნეო სეზონის წინაშე აყენებს. მათ შორის ნილსენიცაა, მიუხედავად იმისა, რომ მოსავლის ფასი გაიზარდა. ზეწოლის საფრთხე მომხმარებლებსაც ემუქრებათ, მათ შორის, წისქვილებს, საცხობებს, რესტორნებსა და სურსათის მაღაზიების მყიდველებს.

აშშ-სა და ევროპაში გვალვები მოსავალს ამცირებს. ლისაბონში დაფუძნებული Freedom24-ის ბაზრის სტრატეგმა ჟოაუ ლამპრეიამ განაცხადა, რომ წლევანდელი „სუპერ“ ელ-ნინიოს პროგნოზი ხორბლის მოსავალზე ამინდის გავლენის შესახებ „რამდენიმე საგანგაშო სიგნალს“ იძლევა.

კლიმატური კრიზისით გამწვავებული ეს მოვლენა სამხრეთ ამერიკის სანაპიროს გასწვრივ, წყნარი ოკეანის ეკვატორულ ნაწილში, თბილ წყალს ზედაპირზე ამოაქვს. ცნობილია, რომ ის სამხრეთ ნახევარსფეროს სოფლის მეურნეობას მნიშვნელოვნად აზიანებს. ექსპერტების თქმით, ხორბლის მარაგი მთავარ ექსპორტიორ ქვეყნებში ისტორიაში მეორე ყველაზე დაბალ ნიშნულზეა. სიმშრალის მოლოდინისა და სასუქის გაზრდილი ხარჯების გამო, ავსტრალიაში ხორბლის ნათესები უკვე 12%-ით შემცირდა.

ფერმერებისა და მომხმარებლებისთვის კარგი ამბავი ისაა, რომ ელ-ნინიომ შესაძლოა შემოდგომასა და გაზაფხულზე სამხრეთ დიდ ვაკეებზე მეტი ნალექი მოიტანოს. ტეხასის ეი-ენდ-ემის უნივერსიტეტის ეკონომისტმა მარკ უელჩმა აღნიშნა, რომ 2015 და 2016 წლებში ბოლო ძლიერი ელ-ნინიოს დროს აშშ-ში ზამთრის ხორბლის მოსავლიანობის ისტორიული რეკორდი დამყარდა. უელჩი მარცვლეულის მარკეტინგს იკვლევს.

თუნდაც ამინდის გავლენა მოსალოდნელზე უკეთესი აღმოჩნდეს, მარცვლეულის გადაზიდვა სხვა მიზეზითაც შეფერხდა. რუსეთი თავს დაესხა შავი ზღვის საპორტო ობიექტებს, ხოლო ამ რეგიონზე ხორბლით გლობალური ვაჭრობის ერთი მესამედი მოდის. შავი ზღვის რეგიონის ფერმერებმა, რომლებიც ხორბლის იმ რამდენიმე ექსპორტიორს შორის იყვნენ, რომლებმაც უხვი მოსავალი მიიღეს, შეტევებამდე მოსავლის აღება ახლახან დაასრულეს.

უელჩის თქმით, ბრძოლების გამო მარაგი დიდწილად მიუწვდომელია, რამაც ფასები გაზარდა. თუმცა, თუ შავი ზღვის რეგიონის ფერმერები და გადამზიდავები ალტერნატიულ მარშრუტებს იპოვიან, ფასები ნაწილობრივ დაიკლებს.