აშშ-მა ორბიტაზე კოსმოსური იარაღის განთავსება პირველად დაადასტურა

აშშ-ის საჰაერო ძალების მდივანმა ტროი მეინკმა განაცხადა, რომ ორბიტაზე განთავსებული იარაღი აშშ-ის ძალების მტრის მტრული მოქმედებებისგან დასაცავად იყო აუცილებელი.

მეინკმა ორშაბათს საჰაერო, კოსმოსური და კიბერუსაფრთხოების კონფერენციაზე თქვა, რომ აშშ „ცვალებადი საფრთხეებისთვის“ მზად იყო. თუმცა, მან იარაღის შესაძლებლობები და ორბიტაზე მისი განთავსების დრო არ დააკონკრეტა.

გავლენიან სამხედრო ხელმძღვანელებს მანამდე ნათქვამი ჰქონდათ, რომ კოსმოსში სამხედრო შესაძლებლობების გაძლიერებას გეგმავდნენ. ისინი რუსეთისა და ჩინეთის პროგრამებზე მიუთითებდნენ, რომლებიც მომავალ კონფლიქტში აშშ-ის თანამგზავრებზე თავდასხმისა და მათი მუშაობის შეფერხების გზებს ავითარებენ.

ტრამპის ადმინისტრაციამ განაცხადა, რომ კოსმოსური შესაძლებლობები და დამჭერი რაკეტები დაგეგმილი თავდაცვითი სისტემის, „ოქროს გუმბათის“, უმნიშვნელოვანესი ნაწილია. სისტემამ აშშ რაკეტებისა და საჰაერო საფრთხეებისგან უნდა დაიცვას.

1967 წლის ხელშეკრულებამ ორბიტაზე მასობრივი განადგურების იარაღი აკრძალა. მას შემდეგ აშშ, რუსეთი, ჩინეთი და სხვა წამყვანი სახელმწიფოები ხელშეკრულების მიღმა დარჩენილ შესაძლებლობებს იკვლევენ. მათ შორისაა მოწინააღმდეგეების თანამგზავრებზე დამიზნება, რომლებიც სამხედრო კავშირის, თვალთვალისა და ნავიგაციისთვის უმნიშვნელოვანესია.

პრეზიდენტმა დონალდ ტრამპმა გასულ წელს აღმასრულებელი ბრძანება გამოსცა. ბრძანებაში მან აშშ-ის კოსმოსური ძალების როლს გაუსვა ხაზი, როგორც ობიექტების დაცვაში, ისე შეტევითი ძალის სახით.

აშშ-ის კოსმოსური ძალები (US Space Force) 2019 წელს შეიქმნა და 70 წელზე მეტი ხნის განმავლობაში აშშ-ის შეიარაღებული ძალების უახლესი შტოა. მისი მიზანი კოსმოსში ამერიკული ობიექტების, მათ შორის კავშირისა და თვალთვალისთვის გამოყენებული ასობით თანამგზავრის დაცვაა.

აშშ-ის კოსმოსური ძალების წარმომადგენელმა თქვა: „კოსმოსის კონტროლი მოიცავს ამ სფეროში დაპირისპირებისა და უპირატესობის მოსაპოვებლად საჭირო ამოცანებს. ამისთვის კინეტიკური და არაკინეტიკური საშუალებები გამოიყენება, რათა მოწინააღმდეგის შესაძლებლობები შეფერხდეს, შესუსტდეს და, საჭიროების შემთხვევაში, განადგურდეს.

ეს შესაძლებლობები საბრძოლო სარდლობების მითითებით შეტევითი და თავდაცვითი მიზნებისთვის შეიძლება გამოიყენონ“.

თებერვლის დასაწყისში ცნობილი გახდა, რომ რუსეთის ორ თანამგზავრს, სავარაუდოდ, სულ მცირე, ათეული ევროპული თანამგზავრის კავშირი ჰქონდა ჩაჭერილი. ეს 2022 წელს უკრაინაში რუსეთის შეჭრის შემდეგ მოხდა.

ასეთი ჩაჭრა რუსეთის სადაზვერვო სამსახურებს თანამგზავრებით გადაცემული საიდუმლო მონაცემების წაკითხვის საშუალებას შესაძლოა აძლევდა. ჰიპოთეზურად, მათ თანამგზავრებზე კონტროლის მოპოვებაც შეეძლოთ.