აშშ-ში AI-ითა და მოპარული იდენტობით სტუდენტურ სესხებს იღებდნენ

აშშ-ის იუსტიციის სამინისტრომ გამოაცხადა ბრალდებები ოპერაცია „მოჩვენებებზე მონადირეების“ ფარგლებში. ოპერაცია სტუდენტური სესხების ფართომასშტაბიან თაღლითობას იძიებდა. უწყების ცნობით, თაღლითები მოპარულ იდენტობას იყენებდნენ სტუდენტურ სესხებზე განაცხადის შესატანად, ხოლო განაცხადის შესავსებად ხელოვნურ ინტელექტს მიმართავდნენ. ამ გზით იქმნებოდა შთაბეჭდილება, თითქოს გამოგონილი სტუდენტი ონლაინგაკვეთილებს ესწრებოდა.

თაღლითური სტუდენტური სესხით მიღებული თანხის უმეტეს ნაწილს სასწავლებლები იღებდნენ. დარჩენილი თანხა თაღლითების საბანკო ანგარიშებზე ირიცხებოდა. შემდეგ ისინი შუამავლებს იყენებდნენ, რათა თანხა აშშ-ის საბანკო ანგარიშებიდან საზღვარგარეთ მყოფ თანამზრახველებთან გადაერიცხათ. ამ დროს, კოლეჯის ნაცვლად საშუალო სკოლის დამთავრების შემდეგ სამუშაოდ წასულ არაინფორმირებულ მსხვერპლებს იმ ხარისხის მისაღები სტუდენტური ვალი ეკისრებოდათ, რომელზეც განაცხადიც კი არ შეუტანიათ.

აშშ-ის რამდენიმე სათემო კოლეჯმა და უნივერსიტეტმა 2021 წელს ფედერალური სტუდენტური დახმარების პროგრამაში თაღლითობის ეჭვი გამოთქვა. შეფასებით, ამ საქმიანობის გამო აშშ-ის მთავრობამ 200 მილიონ დოლარზე მეტი დაკარგა. აშშ-ის განათლების სამინისტროს გენერალური ინსპექტორის ოფისმა საქმე გამოძიების ფედერალური ბიუროს რიჩმონდის საველე ოფისს გადასცა. ამჟამად 40-ზე მეტი ღია თაღლითობის საქმეა, რომელშიც FBI-ის 26 საველე ოფისი და აშშ-ის 20 ფედერალური პროკურატურა მონაწილეობს. იუსტიციის სამინისტრომ ოპერაციას „მოჩვენებებზე მონადირეები“ უწოდა. მის ფარგლებში უკვე ხუთ ადამიანს წაუყენეს ბრალი.

იუსტიციის სამინისტროს თაღლითობასთან ბრძოლის ეროვნული სამმართველოს გენერალური პროკურორის თანაშემწემ, კოლინ მ. მაკდონალდმა, განცხადებაში აღნიშნა: „დღეს ვაცხადებთ ოპერაცია „მოჩვენებებზე მონადირეების“ პირველ შედეგებს. ეს მთელი ქვეყნის მასშტაბით ჩატარებული ძალისხმევაა, რომლის მიზანიც ფედერალური სტუდენტური დახმარების, დაბალშემოსავლიანი ამერიკელებისა და ამერიკელი გადასახადის გადამხდელების წინააღმდეგ მიმართული თაღლითობის დიდი სქემის შეჩერებაა“.

მაკდონალდმა დასძინა: „სამინისტრო ხუთ ბრალდებულს წარუდგენს ბრალს და აცხადებს, რომ ამ სქემასთან დაკავშირებული ქსელის მეშვეობით 750 000 დოლარზე მეტი ღირებულების კრიპტოვალუტა ჩამოართვა. ქსელი კენიელ მოქალაქეებთან იყო დაკავშირებული. ეს კენიაში ამგვარი ტიპის პირველი საერთაშორისო ჩამორთმევაა. თუ ამერიკელების იდენტობას მოიპარავთ, გადასახადის გადამხდელთა ფულს მოიპარავთ ან გამოიყენებთ პროგრამებს, რომლებიც სტუდენტებს მომავლის შექმნაში უნდა დაეხმაროს, გიპოვით. ნებრასკაში იქნებით, ნიუ-ჯერსიში, ვირჯინიაში თუ ნაირობიში, დაგედევნებით“.

ონლაინთაღლითობა ინტერნეტის გაჩენის დღიდან არსებობს, თუმცა ხელოვნურმა ინტელექტმა თაღლითებს უფრო დახვეწილი მეთოდებისა და უფრო დიდი თანხებისკენ მიმართვის საშუალება მისცა. ერთმა თაღლითმა ბრედ პიტის ხელოვნური ინტელექტით შექმნილი გამოსახულება გამოიყენა და 53 წლის ქალს 850 000 დოლარი გამოსძალა. უფრო დიდი ჯგუფებიც იყენებენ ხელოვნური ინტელექტის ინსტრუმენტებს ფულის საშოვნელად. მაგალითად, ჩრდილოეთ კორეა, გავრცელებული ინფორმაციით, ხელოვნურ ინტელექტს იყენებდა, რათა თავის მოქალაქეებს დასავლურ კომპანიებში სამსახური ეშოვათ და ქვეყნის ხაზინა შეევსოთ. აშშ სტუდენტურ სესხებთან დაკავშირებული თაღლითობის აღსაკვეთად ავტომატიზებულ სისტემებს ნერგავს. თუმცა, იდენტიფიკაციასთან დაკავშირებული დამატებითი ტვირთი და მცდარი დადებითი შედეგები ყველაზე მოწყვლად სტუდენტებს აზარალებს.