საფრანგეთის დეპუტატებმა დაამტკიცეს ინტერნეტის ტრაფიკზე დაფუძნებული 10 მილიარდი ევროს გადასახადი

საფრანგეთმა დაამტკიცა გადასახადის პროექტი, რომელიც ქვეყანაში ფრანგი მომხმარებლებისთვის გაგზავნილი ინტერნეტმონაცემების თითოეულ გიგაბაიტზე დაწესდება. სამიზნეში Google, Netflix, TikTok და Meta მოხვდნენ. ეროვნული ასამბლეის ოქმის თანახმად, დეპუტატებმა 30 ოქტომბერს წინადადებას მხარი 11 ხმით 10-ის წინააღმდეგ დაუჭირეს. ეს ნიშნავს, რომ ახალი კანონი ქვეყნის მომდევნო ბიუჯეტში შეიტანეს, მიუხედავად მთავრობისა და საფინანსო კომიტეტის მომხსენებლის ძლიერი წინააღმდეგობისა. სოციალისტი დეპუტატის, ლორან ლარდიტის, მიერ წარდგენილი უახლესი ცვლილებით, კონტენტის გამავრცელებლებს მთავრობაში ფრანგი მომხმარებლებისთვის გავრცელებული კონტენტის თითოეულ გიგაბაიტზე 0,55 ევროს, დაახლოებით 0,62 დოლარის, გადახდა მოუწევთ.

საფრანგეთში დაახლოებით 154 მილიონი ინტერნეტმომხმარებელია და ეს რიცხვი იზრდება. კანონპროექტის ავტორების თქმით, გადასახადმა მთავრობას წელიწადში დაახლოებით 10 მილიარდი ევროს, ანუ 11,2 მილიარდი დოლარის, შემოსავალი შეიძლება მოუტანოს. ლორან ლარდიტმა განაცხადა: „ეს ცვლილება ითვალისწინებს გადასახადს ციფრული მონაცემების ნაკადზე, რომელსაც კონტენტის გამავრცელებლები ქმნიან და თავადვე გადაიხდიან. მოსალოდნელი შემოსავალი 10 მილიარდი ევროა“.

წინადადებას ჯერ პარლამენტის შემდგომი განხილვა სჭირდება. ის კომპანიებზეა მიმართული, რომლებიც ინტერნეტტრაფიკის დიდ ნაწილს ქმნიან, და არა მათ სარეკლამო შემოსავალზე, მოგებასა თუ გამოწერებზე. განმარტებით შენიშვნებში მთავარ შესაძლო გადამხდელებად დასახელებულია Google, Meta, Netflix, Amazon და კონტენტის მიწოდების ქსელი Akamai. TikTok და მსგავსი პლატფორმებიც შეიძლება ამ ფართო ჩარჩოში მოექცნენ, იმის მიხედვით, როგორ გამოიყენებენ წესებს.

ინტერნეტმომსახურების მომწოდებლებს, მათ შორის Orange Free-სა და Liad-ს, მონაცემების მოცულობის გაზომვა და იმ კომპანიების იდენტიფიცირება დაევალებათ, რომლებიც მათ ფრანგ მომხმარებლებს უგზავნიან. მონაცემებს ყოველკვარტალურად შეაგროვებენ და საფრანგეთის საგადასახადო სამსახურს წარუდგენენ, ტელეკომუნიკაციების მარეგულირებელი ორგანოს, Arcep-ის, ზედამხედველობით. თითოეულ გიგაბაიტზე 0,55 ევროს გადასახადის გარდა, წინადადება კომპანიის ფრანგული შემოსავლის 15%-ის ან მსოფლიო შემოსავლის 2%-ის ოდენობის ზედა ზღვარსაც ადგენს. წინადადება კონტენტის მიწოდების ქსელებსაც მოიცავს. ეს ქსელები ონლაინკონტენტის ასლებს მომხმარებლებთან ახლოს ინახავენ, რათა გვერდების ჩატვირთვა და ქსელის გადატვირთვა შეამცირონ.

საფრანგეთის ინტერნეტმომსახურების მომწოდებლების ქსელებში წელიწადში დაახლოებით 200 მილიარდი გიგაბაიტი მონაცემი გადის. ცვლილებაში დასახელებული დაახლოებით ხუთი მსხვილი კომპანია ამ ტრაფიკის დაახლოებით ნახევარს ქმნის. ლარდიტის თქმით, გადასახადი ძირითადად გლობალურ ტექნოლოგიურ კომპანიებს შეეხება, რადგან საფრანგეთის მომხმარებლებამდე მიმავალი მონაცემების უმეტესობას სწორედ ისინი ქმნიან. მან ასევე არ გაიზიარა მოსაზრება, რომ პლატფორმები დამატებით ხარჯებს მომხმარებლებს გადააკისრებენ. მაგალითად, მან Facebook, Instagram და TikTok დაასახელა, სადაც სარგებლობა უფასოა. ლარდიტმა აღნიშნა: „მომხსენებელი გამუდმებით ამტკიცებს, რომ გადასახადს მომხმარებლებს გადააკისრებენ. თუმცა ვერ ვხვდები, როგორ შეიძლება ეს გადასახადი Facebook-ის, Instagram-ის ან TikTok-ის მომხმარებლებს გადააკისრონ, როცა ეს სერვისები უფასოა“.