აშშ ვენესუელას პოლიტპატიმრების გათავისუფლებისკენ მოუწოდებს

აშშ ვენესუელას მოუწოდებს, სამხრეთ ამერიკის ქვეყანაში დარჩენილი პოლიტპატიმრები გაათავისუფლოს.

3 იანვარს აშშ-ის ძალებმა კარაკასზე სამხედრო რეიდისას ვენესუელის ლიდერი ნიკოლას მადურო დააკავეს და ნიუ-იორკში გადაიყვანეს, სადაც მას ნარკოტრაფიკისა და წამების ბრალდებით გაასამართლებენ. მას შემდეგ 1 000-ზე მეტი პოლიტპატიმარი გაათავისუფლეს.

ვენესუელელი პატიმრების უფლებადამცველი ჯგუფის, Foro Penal-ის ცნობით, 322 ადამიანი კვლავ პატიმრობაში რჩება.

აშშ-ის სახელმწიფო დეპარტამენტის ცნობით, სახელმწიფო მდივანი მარკო რუბიო ორშაბათს ვენესუელელ კოლეგას, ოლივერ ბლანკოს შეხვდა. რუბიომ პატიმრების გათავისუფლება მოითხოვა და რეფორმები განიხილა, რომელთა მიზანიც თავისუფალი, სამართლიანი და სანდო არჩევნებისთვის საფუძვლის მომზადებაა.

პოლიტპატიმრების გათავისუფლება ვენესუელის ოპოზიციის ლიდერის, მარია კორინა მაჩადოს, დიდი ხნის მოთხოვნაა.

მაჩადო, რომელსაც 2025 წელს ნობელის მშვიდობის პრემია მიენიჭა, თითქმის ერთწლიანი დევნილობის შემდეგ 25 ოქტომბერს ვენესუელაში დაბრუნდა. მისი ერთ-ერთი პირველი შეხვედრა პოლიტპატიმრების ნათესავებთან შედგა.

დაკავებულთა დიდი ნაწილი 2024 წლის საპრეზიდენტო არჩევნების შემდეგ დააკავეს.

ეროვნულმა საარჩევნო საბჭომ, რომელშიც ხელისუფლების მხარდამჭერები დომინირებენ, მოქმედი პრეზიდენტი ნიკოლას მადურო გამარჯვებულად გამოაცხადა. თუმცა, ოპოზიციის მიერ შეგროვებული და დამოუკიდებელი მედიასაშუალებების მიერ გადამოწმებული საარჩევნო ოქმების ასლები მიუთითებდა, რომ არჩევნებში ოპოზიციის კანდიდატმა გაიმარჯვა.

კარტერის ცენტრმა, რომელმაც ვენესუელაში დამოუკიდებელი დამკვირვებლები გაგზავნა, ასევე განაცხადა, რომ არჩევნები „დემოკრატიულად ვერ ჩაითვლებოდა“.

გაეროს საგამოძიებო მისიამ დაადგინა, რომ მომდევნო თვეებში ვენესუელის მთავრობამ „მკაცრი რეპრესიები მოაწყო იმ ადამიანების წინააღმდეგ, რომლებსაც პოლიტიკურ მოწინააღმდეგეებად მიიჩნევდნენ, ან უბრალოდ იმიტომ, რომ ისინი ხელისუფლების წინააღმდეგ განსხვავებულ ან კრიტიკულ მოსაზრებებს გამოთქვამდნენ“.

აშშ-ის ძალების მიერ მადუროს დაკავების შემდეგ, მისმა ერთგულმა ვიცე-პრეზიდენტმა დელსი როდრიგესმა დროებითი პრეზიდენტის ფიცი დადო.

როდრიგესს ტრამპის ადმინისტრაცია უჭერს მხარს, თუმცა ვენესუელის ოპოზიციური პარტიები რეფორმების ნელი ტემპით უკმაყოფილებას გამოხატავენ.

ორშაბათის განცხადებაში აშშ-ის სახელმწიფო დეპარტამენტმა ხაზი გაუსვა, რომ ერთგული რჩება პრეზიდენტ დონალდ ტრამპის სამფაზიანი გეგმისა. გეგმა მოიცავს „სტაბილიზაციას, ეკონომიკურ აღდგენასა და პოლიტიკურ შერიგებას, ასევე დემოკრატიულ გარდაქმნას“.