ბლუმბერგი: რუსეთი დასავლეთზე ჰიბრიდულ თავდასხმებს აძლიერებს

ბლუმბერგი (Bloomberg) ვრცელ გამოძიებაში იტყობინება, რომ რუსეთის ჰიბრიდული თავდასხმები ევროპის ქვეყნებზე უფრო აგრესიული და დაუფიქრებელი ხდება. გამოცემასთან მოსაუბრე ევროპელი ოფიციალური პირების თქმით, თავდასხმებს მშვიდობიანი მოსახლეობის მსხვერპლი ადრე თუ გვიან მოჰყვება.

წარსულში რუსეთს არჩევნებში ჩარევასა და ევროპაში ჩასვლის მსურველი მიგრანტების იარაღად გამოყენებაში ადანაშაულებდნენ. ახლა მას დივერსიებში, ხანძრების გაჩენაში, სასიცოცხლოდ მნიშვნელოვან ინფრასტრუქტურაზე თავდასხმებში, კიბერშეტევებსა და საჰაერო სივრცის დარღვევაში ეჭვობენ.

ბევრი შემთხვევა, განსაკუთრებით კიბერშეტევები და სისტემებში შეღწევა, საჯაროდ არ ხმაურდება. შესაბამისად, ჰიბრიდული კამპანიის რეალური მასშტაბი ცნობილზე ბევრად დიდია.

ნატოს ოფიციალურმა პირმა სააგენტოს განუცხადა, რომ ბოლო ორი თვის განმავლობაში რუსეთი უკრაინის მხარდაჭერასთან პირდაპირ დაკავშირებულ თავდაცვითი მრეწველობისა და ლოგისტიკის ობიექტებზე თავდასხმებს ამძაფრებდა. მისი თქმით, კამპანია უფრო აგრესიული გახდა და მეტ საფრთხეს შეიცავს. მან დასძინა, რომ რუსეთის ჰიბრიდული თავდასხმები სტრატეგიულ მიზნებს ემსახურება და უშუალო ფიზიკური ზიანის მიყენებას არ ისახავს მიზნად.

გაერთიანებული სამეფოს თავდაცვისა და უსაფრთხოების კვლევითი ინსტიტუტის (Royal United Services Institute, RUSI) მკვლევარმა ემილი ფერისმა განაცხადა: „რუსეთი თანმიმდევრულად ადგენს ნატოს ინფრასტრუქტურის სუსტ წერტილებს. ის მზადაა, სულ უფრო სარისკო მოქმედებებით მოქნილად მოსინჯოს მრავალი ტაქტიკა და სამიზნე“.

ევროპელი ოფიციალური პირები დარწმუნებული არიან, რომ ამ ოპერაციების უკან მოსკოვი დგას. ოპერაციები ისეა დაგეგმილი, რომ რუსეთის ხელისუფლებას მათთან კავშირის დამაჯერებლად უარყოფა შეეძლოს. უშუალო შემსრულებლებს, როგორც წესი, შუამავლების მეშვეობით, ფულის სანაცვლოდ ქირაობენ.

ბლუმბერგის სადაზვერვო წყაროების ცნობით, რუსეთი სასოწარკვეთილების გამო მოქმედებს. უკრაინული დრონების დარტყმებმა ლოგისტიკურ ცენტრებზე, ასევე საწვავისა და ენერგეტიკის სექტორზე, მის ეკონომიკას ზიანი მიაყენა. რაც უფრო მტკივნეული ხდება უკრაინის დარტყმები, რუსეთის ხელმძღვანელობაში მით უფრო ხმამაღლა მოითხოვენ, რომ ევროპამ კიევის მხარდაჭერისთვის პასუხი აგოს.

კრემლთან დაახლოებულმა წყარომ ბლუმბერგს პირდაპირ უთხრა, რომ რუსეთი უკრაინის მხარდაჭერის გამო ევროპისთვის ასიმეტრიული ჰიბრიდული ოპერაციებით „ცხოვრების ჯოჯოხეთად ქცევას“ აპირებს.

თუმცა, გამოცემის ცნობით, კამპანიამ ჯერჯერობით საპირისპირო შედეგი გამოიღო. გერმანიის შინაგან საქმეთა მინისტრმა ალექსანდერ დობრინდტმა განაცხადა, რომ ქვეყანა „ჰიბრიდული ომის ყოველდღიური სამიზნე“ ხდება. მიუხედავად ამისა, გერმანიამ უკრაინისთვის საჰაერო თავდაცვის სისტემების რაკეტების მიწოდება გამოაცხადა. ქვეყანამ უკრაინის არმიისთვის დრონების სერიული წარმოებაც დაიწყო.