ბუკელეს თქმით, ჰაიტური ბანდის შტაბი გაანადგურეს

ცნობილ ბანდას, „400 მაოვოზოს“, რომელიც ადამიანების გატაცებითა და დაშინებითაა ცნობილი, სახმელეთო და საჰაერო იერიშის სამიზნედ აქციეს ჰაიტის დედაქალაქ პორტ-ო-პრენსის გარეუბანში მდებარე კომპლექსში.

ეს ელ სალვადორის პირველი სამხედრო ოპერაციაა ჰაიტურ ობიექტზე მას შემდეგ, რაც გასულ თვეში იქ 2 000-ზე მეტი ჯარისკაცი გაგზავნა. ისინი ოთხი დაკარგული სალვადორელი ტექნიკოსის გადასარჩენად მიმდინარე მისიაში მონაწილეობენ.

ჰაიტიზე წლების განმავლობაში მძვინვარებს ბანდების ძალადობა. მძიმედ შეიარაღებული ჯგუფები დედაქალაქის დიდ ნაწილს და მის შემოგარენს აკონტროლებენ.

ელ სალვადორის პრეზიდენტმა ნაიბ ბუკელემ ეს ამბავი X-ზე გამოაცხადა და დაიკვეხნა, რომ ბანდის წევრების უმეტესობა ბრძოლის მცდელობის გარეშე გაიქცა.

ბუკელემ სამშაბათს დაწერა: „ჩვენ გავანადგურეთ [ბანდის ლიდერ] ლანმო სან ჟუს სახლი და 400 მაოვოზოს ბანდის შტაბი“.

პოსტს თან ერთვოდა ვიდეო, რომელშიც რამდენიმე ვერტმფრენი დიდ კომპლექსს ესვრის. გავრცელებული ცნობით, კომპლექსი კრუა-დე-ბუკეს გარეუბანში მდებარეობს, რომელიც ბანდის საყრდენია.

ვიდეოში ჩანს, როგორ დაფრინავენ ვერტმფრენები კომპლექსის თავზე და ათობით ადამიანი შენობიდან გამორბის, რათა დარტყმებს გაექცეს.

რამდენიმე მედიასაშუალების ცნობით, შესაძლოა, 20-მდე ადამიანი დაიღუპა, თუმცა ხელისუფლებას ეს არ დაუდასტურებია. ოფიციალურად არც ობიექტისთვის მიყენებული ზარალის მასშტაბი დადასტურებულა. ჰაიტელები კითხულობენ, კომპლექსი გაანადგურეს თუ მხოლოდ დააზიანეს.

„მაიამი ჰერალდის“ ცნობით, ბანდის ლიდერი, უილსონ „ლანმო სან ჟუ“ ჟოზეფი, იერიშის დროს იქ არ იმყოფებოდა.

ბი-ბი-სის არ შეუძლია გადაამოწმოს ბუკელეს მიერ გამოქვეყნებული ვიდეო ან ის, რომ ობიექტი მართლაც ბანდის შტაბია.

„მაიამი ჰერალდის“ ცნობით, იერიშში მონაწილეობდა ჰაიტის ეროვნული პოლიციის დრონების დანაყოფი, რომელსაც სალვადორელი ჯარისკაცები ეხმარებოდნენ. გამოცემა ინფორმაციას რამდენიმე წყაროზე დაყრდნობით ავრცელებს.

ჰაიტის პრემიერ-მინისტრმა ალიქს დიდიე ფილს-ემემ იერიშის შემდეგ X-ზე სალვადორელ სამხედროებს „ბანდების წინააღმდეგ ბრძოლაში“ ერთგულებისთვის მადლობა გადაუხადა. მან თქვა, რომ ორი ქვეყანა გაეროს მხარდაჭერით მოქმედ ბანდების წინააღმდეგ ბრძოლის ძალასთან (GSF) ერთად გააგრძელებს თანამშრომლობას, რათა „ტერიტორიაზე კონტროლი დაიბრუნოს და სახელმწიფო ხელისუფლება აღადგინოს“.

ფილს-ემემ დასძინა: „ბანდებს ძილი არ ექნებათ!“

გასულ თვეში ჰაიტიზე დაახლოებით 2 000 სალვადორელი ჯარისკაცი გაგზავნეს. მანამდე, ოქტომბერში, ოთხი საჰაერო ძალების ტექნიკოსი საკვების საყიდლად ყოფნისას, იარაღის მუქარით გაიტაცეს.