ჩრდილოეთ კორეამ კასეტური საბრძოლო ქობინები გამოსცადა

ჩრდილოეთ კორეამ, ოფიციალური ცნობით, შაბათს კასეტური ბომბების ქობინებით აღჭურვილი იარაღის სისტემა გამოსცადა. განაცხადეს, რომ გამოცდის მიზანი მათი გამოყენების შესაძლებლობისა და ეფექტის შემოწმება იყო. ჩრდილოეთ კორეის მთავრობის ცნობით, ამგვარი ქობინებით აღჭურვილი რაკეტების დამანგრეველი ძალა დიდია. მათი თქმით, იარაღს 12-დან 13 ჰექტრამდე სამიზნე ტერიტორიის სრულად განადგურება შეუძლია.

ეროვნული სარაკეტო სააგენტოს წარმომადგენელმა განმარტა, რომ ქობინები ოთხ კატეგორიად იყოფა, თუმცა დეტალებზე არ უსაუბრია. სახელმწიფო საინფორმაციო სააგენტო KCNA-ს ცნობით, ჩრდილოეთ კორეა 2026 წლის ბოლომდე თავის სამხედრო ნაწილებს ამ ბომბების ყველა სახეობის, დანიშნულების მიხედვით გამოყენების შესაძლებლობას მისცემს.

KCNA-ს მიერ გავრცელებულ ფოტოებზე ნაჩვენები იყო მობილური გამშვები დანადგარიდან რაკეტის გაშვება და კუნძულზე რამდენიმე აფეთქება. ჩრდილოეთ კორეის ლიდერი კიმ ჩენ ინი გამოცდას არ დასწრებია. აპრილში კი ის კასეტური საბრძოლო ქობინების გამოცდას დაესწრო.

სამხრეთ კორეის ცნობით, ჩრდილოეთ კორეამ ხუთშაბათს აღმოსავლეთის ზღვის მიმართულებით დაახლოებით ათეული მოკლე რადიუსის ბალისტიკური რაკეტა გაუშვა. მანამდე ძლიერ გამაგრებულ საზღვარზე დაძაბულობა გამწვავდა: აფეთქების შედეგად სამხრეთ კორეელი სამი ჯარისკაცი დაშავდა. სეული ვარაუდობს, რომ აფეთქება ჩრდილოეთ კორეის ნაღმმა გამოიწვია, რასაც ფხენიანი უარყოფს.

აშშ-მა, სამხრეთ კორეამ და იაპონიამ პარასკევს კიდევ ერთხელ მოითხოვეს ჩრდილოეთ კორეის „სრული დენუკლეარიზაცია“. ქვეყანა საერთაშორისო სანქციების მიუხედავად, ბირთვული იარაღისა და სარაკეტო პროგრამების განვითარებას განაგრძობს. ჩრდილოეთ კორეამ თანამედროვე ომის წარმოების გამოცდილება, მათ შორის, უკრაინაში რუსეთის მხარდასაჭერად ჯარის გაგზავნით მიიღო.

აშშ-ის პრეზიდენტი დონალდ ტრამპი ჩრდილოეთ კორეასთან ურთიერთობისას არაერთხელ საუბრობდა შემრიგებლური ტონით. პირველი საპრეზიდენტო ვადის განმავლობაში ის კიმ ჩენ ინს სამჯერ შეხვდა. აგვისტოში ტრამპმა განაცხადა, რომ ჩრდილოეთ კორეის ლიდერთან შეხვედრა ამავე წლის განმავლობაში სურდა. თუმცა საერთაშორისო თანამეგობრობისგან დიდწილად იზოლირებულ ქვეყანასთან დენუკლეარიზაციის შესახებ შეთანხმების იმედები არ გამართლდა.

ჩრდილოეთ კორეა ბირთვული იარაღისა და სარაკეტო პროგრამების გამო წლებია, მკაცრი საერთაშორისო სანქციების ქვეშაა. ფხენიანი პროგრამებს მაინც განაგრძობს და 2023 წელს ბირთვული სახელმწიფოს სტატუსი კონსტიტუციაშიც კი ჩაწერა. სამხრეთ კორეის მთავრობის შეფასებით, ჩრდილოეთ კორეას 80-დან 120-მდე ბირთვული იარაღი აქვს.

სამხრეთ და ჩრდილოეთ კორეა ოფიციალურად ომის მდგომარეობაში არიან, რადგან კორეის ომი 1953 წელს მხოლოდ ზავით დასრულდა და სამშვიდობო ხელშეკრულება არ გაფორმებულა.