მოსკოვში აშშ-ის საელჩო მასობრივი მსხვერპლის რისკის შესახებ აფრთხილებს

მოსკოვში აშშ-ის საელჩომ რუსეთის დედაქალაქის ხელისუფლება შესაძლო ტერორისტული თავდასხმის შესახებ გააფრთხილა. დიპლომატიური წარმომადგენლობის ცნობით, შაბათს ცარიცინოს სასახლე-პარკში შესაძლოა „მასობრივი მსხვერპლის გამომწვევი შემთხვევა“ მოხდეს.

საელჩო რუსეთის ხელისუფლებასთან თანამშრომლობს. აშშ-ის მოქალაქეებს ურჩიეს, სასახლე-პარკს არ მიუახლოვდნენ.

რუსეთის უშიშროების ფედერალურმა სამსახურმა (ФСБ) მოგვიანებით განაცხადა, რომ ამერიკულმა მხარემ მოსალოდნელი ტერორისტული თავდასხმის შესახებ გააფრთხილა. სახელმწიფო სააგენტო „ტასის“ ცნობით, ФСБ-მ განაცხადა: „ამერიკული მხარისგან პარტნიორული არხით მივიღეთ ინფორმაცია მოსკოვში ტერორისტული თავდასხმისთვის მზადების შესახებ“. უწყების თქმით, „შესაბამის ზომებს ვიღებთ“. ამ დროისთვის დამატებითი დეტალები არც ამერიკულ და არც რუსულ მხარეს არ გაუვრცელებია.

ჟურნალ „შპიგელის“ ინფორმაციით, მოსკოვში გერმანიის საელჩომაც მოუწოდა მოქალაქეებს, ცარიცინოს პარკს მოერიდონ, „უსაფრთხოების მიმდინარე საფრთხის შესახებ კონკრეტული ინფორმაციის საფუძველზე“. საელჩომ გააფრთხილა: „გთხოვთ, ზოგადად გამოიჩინოთ სიფრთხილე და მოერიდოთ ხალხმრავალ ადგილებსა და საზოგადოებრივ სივრცეებს“.

მოსკოვის სამხრეთით მდებარე ცარიცინოს ნაკრძალი ეკატერინე დიდმა ქალაქის გარეუბანში მამულად დაგეგმა და მისი მშენებლობა ნაწილობრივ დაასრულა. პარკი და შენობები დაახლოებით 20 წლის წინ აღადგინეს.