ჩრდილოეთ კორეამ წვრთნაზე იარაღის „უზარმაზარი დამანგრეველი ძალა“ აჩვენა

სახელმწიფო საინფორმაციო სააგენტო KCNA-ს ცნობით, შაბათის გამოცდისას სხვადასხვა ტიპის იარაღი ერთდროულად გაისროლეს. სწავლების მიზანი ჩრდილოეთ კორეის სამხედროების საბრძოლო სულისკვეთების ამაღლება და მათი შესაძლებლობების გაუმჯობესება იყო, რათა მათ „მტერი სრულად გაანადგურონ“.

KCNA-ს ცნობით, წვრთნაში არმიის ხუთი დანაყოფი მონაწილეობდა. მათ მოიერიშე დრონები, ტაქტიკური ფრთოსანი რაკეტები, ტაქტიკური ბალისტიკური რაკეტები და იარაღის სხვა სისტემები გამოსცადეს.

ექსპერტების თქმით, ჩრდილოეთ კორეა შეიარაღებასთან დაკავშირებულ საქმიანობას არ ანელებს. ეს მას შემდეგაც გრძელდება, რაც აშშ-ის პრეზიდენტმა დონალდ ტრამპმა სამხრეთ კორეასთან სამხედრო წვრთნის მასშტაბი შეამცირა. როგორც ჩანს, ამ ნაბიჯით ტრამპი ჩრდილოეთ კორეის ლიდერ კიმ ჩენ ინთან დიპლომატიის აღდგენას ცდილობდა.

KCNA-მ ჩრდილოეთ კორეის მარშალ პაკ ჩონ ჩონის სიტყვები გაავრცელა: „წვრთნის მიზანი პროფესიონალიზმის დონის ამაღლება იყო, რათა ბრძანების გაცემის შემდეგ მტრის შეიარაღებული ძალები ორგანიზაციულად და სტრუქტურულად განადგურდეს“. პაკმა დასძინა: „მობილიზებულმა შეიარაღების სისტემებმა კონცენტრირებული ცეცხლის უზარმაზარი დამანგრეველი ძალა აჩვენა“.

სამხრეთ კორეის გაერთიანებულმა შტაბმა განაცხადა, რომ შაბათს რამდენიმე რაკეტა გაისროლეს. მათ დაახლოებით 250 კილომეტრი (155 მილი) გაიარეს და ჩრდილოეთ კორეის აღმოსავლეთ წყლებში ჩავარდნენ.

გავლილი მანძილი მიუთითებს, რომ იარაღი სამხრეთ კორეაში მდებარე სამიზნეების, მათ შორის აშშ-ის სამხედრო ბაზების დასარტყმელადაა შექმნილი.

საბრძოლო სროლები აშშ-ის, სამხრეთ კორეისა და იაპონიის სამმხრივი სამხედრო წვრთნის დასრულებიდან ერთი დღის შემდეგ ჩატარდა. ჩრდილოეთ კორეა ამ წვრთნას პროვოკაციად მიიჩნევს.

აგვისტოში ტრამპმა პენტაგონს სამხრეთ კორეასთან ერთობლივი წვრთნის, „ულჩი ფრიდომ შილდის“, „მნიშვნელოვნად შემცირება“ დაავალა. აშშ-ის პრეზიდენტის თქმით, გადაწყვეტილება კიმ ჩენ ინთან მისმა კარგმა ურთიერთობამ განაპირობა.

ჩრდილოეთ კორეამ ტრამპის ნაბიჯი უარყო და განაცხადა, რომ წვრთნის შემცირებას მისი „პროვოკაციული, აგრესიული ხასიათი“ არ შეუცვლია.

წვრთნა თავდაპირველად დაგეგმილზე ექვსი დღით ადრე დასრულდა.

ექსპერტების თქმით, კიმ ჩენ ინი, სავარაუდოდ, მიიჩნევს, რომ აშშ-თან შესაძლო დიპლომატიურ მოლაპარაკებებში მისი პოზიცია გაუმჯობესდა. მან ტრამპთან პირველი შეხვედრები 2018 და 2019 წლებში გამართა. კიმმა ამ წლის დასაწყისში განაცხადა, რომ მოლაპარაკებებს დაუბრუნდებოდა, თუ აშშ მისი ქვეყნის მიმართ „მტრულ პოლიტიკას“ მიატოვებდა და ჩრდილოეთ კორეას ბირთვულ სახელმწიფოდ აღიარებდა.