ჩრდილოეთმა კორეამ კვლავ ბალისტიკური რაკეტები გაუშვა

აშშ-ის პრეზიდენტი დონალდ ტრამპი ჩრდილოეთ კორეის ლიდერ კიმ ჩენ ინთან კარგ ურთიერთობაზე საუბრობს. თუმცა, აშშ-ის, სამხრეთ კორეისა და იაპონიის სამხედრო წვრთნების დასრულებისთანავე, ჩრდილოეთმა კორეამ რაკეტები გაუშვა.

სამხრეთ კორეის, აშშ-ისა და იაპონიის შეიარაღებული ძალების სამხედრო წვრთნების დასრულებიდან ერთი დღის შემდეგ, ჩრდილოეთმა კორეამ კვლავ რამდენიმე ბალისტიკური რაკეტა გაუშვა. ამ ქვეყნების ცნობები ერთმანეთს ემთხვევა. სამხრეთ კორეის გენერალურმა შტაბმა განაცხადა, რომ რაკეტებმა იაპონიის ზღვის მიმართულებით 250 კილომეტრი დაფარეს.

რაკეტები სამხრეთ კორეის, აშშ-ისა და იაპონიის ხუთდღიანი სამხედრო წვრთნების დასრულების შემდეგ გაუშვეს. წვრთნა „ფრიდომ ეჯი“ (Freedom Edge) ჩრდილოეთ კორეიდან შესაძლო საფრთხისთვის მზადებაზე იყო ორიენტირებული.

ჩრდილოეთმა კორეამ რამდენიმე რაკეტა იაპონიის ზღვის მიმართულებით უკვე 20 აგვისტოს გაუშვა. იმ დროს აშშ-ისა და სამხრეთ კორეის შეიარაღებული ძალები ყოველწლიურ ერთობლივ წვრთნებს ატარებდნენ. გაეროს რამდენიმე რეზოლუცია იზოლირებულ ქვეყანას ბალისტიკური რაკეტების გაშვებას უკრძალავს.

ფხენიანი აშშ-ისა და სამხრეთ კორეის ერთობლივ წვრთნებს დიდი ხანია აკრიტიკებს. ის წვრთნების დროს ხშირად სარაკეტო გამოცდებს ატარებს. ჩრდილოეთ კორეის თავდაცვის მინისტრმა კიმ სონ გიმ ბოლო წვრთნებს პროვოკაციული უწოდა და „მტკიცე და შესაბამისი საპასუხო ზომებით“ დაიმუქრა.

აშშ და მისი პარტნიორი სამხრეთ კორეა ერთობლივ სამხედრო წვრთნებს ყოველწლიურად ატარებენ. თუმცა, წელს ისინი დაგეგმილზე მნიშვნელოვნად მოკლე იყო.

სარაკეტო გამოცდები ჩრდილოეთის მიმართ აშშ-ის პრეზიდენტ დონალდ ტრამპის შემრიგებლური ჟესტების მიუხედავად ჩატარდა. ტრამპმა სამხრეთ კორეასთან ერთობლივი სამხედრო წვრთნების მნიშვნელოვნად შემცირება ბრძანა.

აშშ-ის პრეზიდენტმა ჩრდილოეთ კორეის ლიდერ კიმ ჩენ ინთან თავის სავარაუდოდ „ძალიან კარგ ურთიერთობაზე“ მიუთითა. ტრამპმა თქვა, რომ კიმთან შეხვედრას ჯერ კიდევ წელს ელოდება. კიმს შეხვედრის შეთავაზებაზე საჯაროდ ჯერ არაფერი უთქვამს.

კიმის სტრატეგიული მდგომარეობა ბოლო ხანებში განსაკუთრებით მყარია. ამის ერთ-ერთი მიზეზი უკრაინის ომში რუსეთის მხარდაჭერაა.

კიმმა რამდენიმე დღის წინ განაცხადა, რომ ბირთვული შეკავების ფარგლებში საზღვაო ძალების გაძლიერება სურს. მისი თქმით, საზღვაო ძალები ბირთვული იარაღით აღჭურვილ ძალად უნდა გარდაიქმნას. სახელმწიფო საინფორმაციო სააგენტო KCNA-ს ცნობით, კიმმა თქვა: „უნდა უზრუნველვყოთ, რომ ბირთვული შეიარაღების სისტემები რეალურ ომში მრავალმხრივად და ეფექტიანად გამოვიყენოთ“.