დასავლეთ სანაპიროზე ახალმოსახლეები პალესტინელებს დაბრუნებაში ხელს უშლიან

თუბასების ოჯახი თითქმის 70 დღეა, დასავლეთ სანაპიროს სოფელ ჯალუდში მდებარე სახლში ვეღარ ბრუნდება. მაჰმუდ თუბასი ტელეფონით ჰყვება, როგორ გააძევეს ივლისის ბოლოს ისრაელმა ექსტრემისტმა ახალმოსახლეებმა.

ვითარების კიდევ უფრო გამწვავების შემდეგ თუბასიმ ოჯახთან ერთად სახლი საბოლოოდ დატოვა. მან გაძევება სასამართლოში გაასაჩივრა და საქმე მოიგო: ოჯახს დაბრუნების უფლება მიეცა. ისრაელის ჯარისკაცებმა და სასაზღვრო პოლიციელებმა თუბასი ავტომობილების კოლონით სოფელში დააბრუნეს.

მაჰმუდ თუბასი და მისი ცოლი თავიანთ ნაკვეთს შორიდან უყურებენ.

თუბასის თქმით, სახლში დაბრუნებიდან ხუთი წუთიც არ გასულა, როცა ახალმოსახლეები მათ კვლავ დაესხნენ თავს, ქვები დაუშინეს და ყვირილი დაიწყეს. მას ახალმოსახლეების რაოდენობამ გააოცა: იქ თითქმის 150 ადამიანი იყო.

პალესტინელის თქმით, ჯარისკაცები მის და მისი ოჯახის დაცვას ცდილობდნენ და ახალმოსახლეების წინააღმდეგ წიწაკის სპრეი გამოიყენეს. თუმცა ვითარების გაკონტროლება ვერ შეძლეს და ოჯახი ავტომობილებთან დააბრუნეს. თუბასი ამბობს: „როცა ახალმოსახლეებმა დაინახეს, რომ სამხედრო ავტომობილში ვსხდებოდით, მანქანის საბურავები დასერეს“.

ისრაელის არმიის ცნობით, არეულობისას სამი სასაზღვრო პოლიციელი დაშავდა. სამხედრო უწყებამ დაადასტურა, რომ ძალადობრივმა ახალმოსახლეებმა ქვები ისროლეს, გზები გადაკეტეს, შენობებსა და ავტომობილებს ცეცხლი წაუკიდეს. პოლიციამ ორი მათგანი დააკავა.

დასავლეთ სანაპიროზე ახალმოსახლეების ძალადობის გამო პრემიერ-მინისტრი ბენიამინ ნეთანიაჰუ ზეწოლის ქვეშაა.

პრემიერ-მინისტრი ბენიამინ ნეთანიაჰუ მომხდარს მოულოდნელად გამოეხმაურა. მისი ოფისის განცხადების თანახმად, ნეთანიაჰუმ უმკაცრესად დაგმო ძალადობრივი არეულობა და ადგილზე მისულ უსაფრთხოების ძალებზე თავდასხმები. განცხადებაში ნათქვამია, რომ რამდენიმე მეამბოხე იუდეასა და სამარიაში მცხოვრებ კანონმორჩილ ახალმოსახლეთა თემს არ წარმოადგენს. ნეთანიაჰუ ისრაელის მიერ ოკუპირებულ დასავლეთ სანაპიროს იუდეასა და სამარიას უწოდებს.

ნეთანიაჰუმ ასევე თქვა, რომ სრულად უჭერს მხარს სამხედროებსა და სასაზღვრო პოლიციელებს, რომლებიც ტერორიზმს ებრძვიან და უსაფრთხოებას უზრუნველყოფენ.

დასავლეთ სანაპიროზე ვითარება თვეებია მწვავდება. ექსტრემისტი ახალმოსახლეები პალესტინურ სოფლებს არაერთხელ ესხმიან თავს. ბევრი კრიტიკოსის აზრით, ისრაელის მთავრობა მათ წინააღმდეგ საკმარის ზომებს არ იღებს.

გაერთიანებულმა სამეფომ განაცხადა, რომ უკანონო დასახლებები ორი სახელმწიფოს პრინციპზე დაფუძნებული გადაწყვეტის შესაძლებლობას საფრთხეს უქმნის.