ეთიოპიის სამთავრობო ძალები ტიგრაიში წინ მიიწევენ

რამდენიმე საინფორმაციო სააგენტომ შაბათს ანონიმურ სამთავრობო წყაროებზე დაყრდნობით გაავრცელა ინფორმაცია, რომ ეთიოპიის ფედერალური ძალები მეკელეში ალულა აბა ნეგას აეროპორტს აკონტროლებენ.

ეთიოპიელმა გენერალმა ასოშიეიტედ პრესს ანონიმურობის პირობით უთხრა: „სამხედროები აეროპორტს სრულად აკონტროლებენ. ამის დადასტურება შემიძლია“.

AFP-მ „ჰუმანიტარულ წყაროზე“ დაყრდნობით გაავრცელა ინფორმაცია, რომ ეთიოპიის სამთავრობო ძალების შესვლისას მეამბოხე ჯგუფები ქალაქს ტოვებდნენ.

არც ერთ მხარეს ოფიციალური განცხადება არ გაუკეთებია იმის შესახებ, თუ ვინ აკონტროლებს მეკელეს. ინფორმაციის გავრცელებას კავშირის გათიშვა და მედიისთვის წვდომის შეზღუდვა ართულებს.

ტიგრაის დედაქალაქიდან გასვლა ტიგრაის სახალხო-განმათავისუფლებელი ფრონტისთვის (TPLF) მარცხი იქნებოდა. ფრონტი ცოტა ხნის წინ ჩრდილოეთ ეთიოპიაში მოქმედ რამდენიმე სხვა შეიარაღებულ ოპოზიციურ ჯგუფს შეუერთდა.

TPLF ტიგრაიში დომინანტური ძალაა მას შემდეგ, რაც წელს მთავრობის მიერ დანიშნული ადმინისტრაცია ჩამოაგდო. შემდეგ მან ომის დროინდელი ყოფილი რეგიონული ლიდერი დებრეციონ გებრემიქაელი რეგიონის პრეზიდენტად დანიშნა.

ადის-აბებაში მოქმედი მთავრობის ეთიოპიის ეროვნული თავდაცვის ძალები სექტემბრის ბოლოდან მეამბოხეთა განახლებულ შეტევას იგერიებენ.

TPLF-მ 23 სექტემბერს მეკელეს აეროპორტი დაიკავა და მეზობელ აფარისა და ამჰარის რეგიონებში სამთავრობო პოზიციებს შეუტია. თავდაპირველი წარმატებების შემდეგ ჯგუფმა ამ კვირაში უკან დაიხია.

გებრემიქაელმა ხუთშაბათს განცხადება გაავრცელა და სამთავრობო ძალების წინააღმდეგ პარტიზანული თავდასხმების გაგრძელების პირობა დადო. მსგავსი რამ 2020 წელსაც მოხდა, როცა მეამბოხეებმა მეკელეზე კონტროლი დაკარგეს.

TPLF, რომელიც ეთიოპიას 1991-დან 2018 წლამდე მართავდა, პრემიერ-მინისტრ აბი აჰმედის მთავრობის დამხობას ცდილობს. 2020-დან 2022 წლამდე სამოქალაქო ომში 600 000-ზე მეტი ადამიანი დაიღუპა.

ჩრდილოეთ ეთიოპიაში განახლებულმა არეულობამ დაძაბულობა მთელ რეგიონში გაავრცელა. შეშფოთებას აფრიკის რქაში უფრო ფართო რეგიონული კონფლიქტის საფრთხე იწვევს.

ეთიოპია წლების განმავლობაში ჩრდილოეთ მეზობელ ერიტრეას ტიგრაელი მეამბოხეების მხარდაჭერაში ადანაშაულებდა. მისი განცხადებით, მათ სუდანი და ეგვიპტეც ეხმარებოდნენ. სამივე ქვეყანა ამას უარყოფს.

გასულ კვირას ეთიოპიამ და ერიტრეამ დიპლომატიური ურთიერთობები გაწყვიტეს. ორივე ქვეყანამ დიპლომატები გააძევა და საელჩოები დახურა.

აფრიკის კავშირმა (African Union) განაცხადა, რომ ეთიოპიას, ერიტრეასა და ეგვიპტეს შორის მზარდი დაძაბულობა აშფოთებს. ორგანიზაციამ ყველა მხარეს მაქსიმალური თავშეკავებისკენ მოუწოდა.