ევროკავშირი ბავშვებისთვის სოციალურ მედიაზე შეზღუდვებს აწესებს

ავსტრალიის კვალდაკვალ, ევროკავშირს ბავშვებისა და მოზარდებისთვის სოციალურ მედიაზე წვდომის კანონით შეზღუდვა სურს. ევროკომისიის პრეზიდენტმა ურსულა ფონ დერ ლაიენმა ოთხშაბათს სტრასბურგში, ევროკავშირის მდგომარეობის შესახებ სიტყვით გამოსვლისას, ეს გეგმა გამოაცხადა. იგი შესაბამის კანონპროექტს უკვე ხუთშაბათს წარადგენს.

ფონ დერ ლაიენმა თქვა: „ბავშვები სულ უფრო ღრმად ეფლობიან სიახლეების ნაკადებში, რომლებიც დაუსრულებელ გადახვევაზეა გათვლილი“. მისი თქმით, სოციალური მედია ბავშვებს მთლიანად ითრევს.

კერძოდ, 13 წლამდე მოზარდებს სოციალური მედიის გამოყენება უნდა აეკრძალოთ. მოზარდები პირადი ანგარიშების შექმნას მხოლოდ 15 წლიდან შეძლებენ. ამ ორ ასაკს შორის მათ სოციალურ მედიასთან გაცნობა მშობლების ან მასწავლებლების ზედამხედველობით, სპეციალური ახალგაზრდული ანგარიშებით შეეძლებათ. ამასთან, გამოყენების დრო შეიზღუდება.

ევროკავშირი ექსპერტთა კომისიის რეკომენდაციაზე უფრო შორს მიდის. ექსპერტებმაც ეტაპობრივი მოდელი შესთავაზეს, თუმცა ასაკობრივ ზღვრად 13 წელი განსაზღვრეს.

მეცნიერები სოციალურ მედიას მწვავე საფრთხედ მიიჩნევენ, განსაკუთრებით ბავშვებისა და მოზარდებისთვის. კვლევები სოციალური მედიის გაზრდილ მოხმარებას ფსიქიკურ დაავადებებს უკავშირებს. მათ შორისაა დეპრესია, კონცენტრაციის დარღვევა და ანორექსია.

კვლევების თანახმად, მოზარდები სოციალურ ქსელებში ყოველდღიურად საშუალოდ ოთხიდან ექვს საათამდე ატარებენ. ბევრი მათგანი ღამითაც აქტიურია. ეს მოზარდებისთვის განსაკუთრებით სახიფათოა, რადგან მათი ტვინი ჯერ სრულად განვითარებული არ არის.

ექსპერტთა ჯგუფი არა მხოლოდ სოციალურ მედიაზე, არამედ ხელოვნურ ინტელექტზე წვდომასაც განიხილავდა. ასაკობრივი მოთხოვნები მასზეც უნდა გავრცელდეს.

აქამდე ევროკავშირი ავსტრალიური მოდელის მიხედვით სოციალური მედიისთვის მინიმალური ასაკის დაწესებას სიფრთხილით ეკიდებოდა. თუმცა ევროკავშირში ამ საკითხს განსაკუთრებით საფრანგეთის პრეზიდენტი ემანუელ მაკრონი აქტიურად უჭერდა მხარს.

ბოლო თვეებში ევროკომისიამ უკვე წარადგინა აპლიკაცია, რომელიც მომხმარებელთა ასაკის შესამოწმებლად სოციალური მედიის პლატფორმებს დაუკავშირდება. აპლიკაციამ მოზარდების პირადი მონაცემები უნდა დაიცვას.

პლატფორმებს მომხმარებლის ზუსტი ასაკის ნაცვლად მხოლოდ ასაკობრივი დიაპაზონი გადაეცემათ. ევროკავშირის მიერ შექმნილი ტექნიკური საფუძვლით ყველა წევრ ქვეყანას საკუთარი ქვეყნისთვის განკუთვნილი აპლიკაციის შემუშავება და გამოყენება შეუძლია.

ამავე დროს, ფონ დერ ლაიენმა მსხვილ ტექნოლოგიურ კომპანიებს მიმართა: „ვაცნობიერებ, რომ ბევრისთვის მსხვილი ტექნოლოგიური კომპანიების ძალაუფლება უბრალოდ დაუძლეველია. მათთან გამკლავება შეუძლებლად მიაჩნიათ. მე სხვაგვარად ვფიქრობ“. ასაკობრივი ზღვარი პლატფორმების ოპერატორებს პასუხისმგებლობისგან არ ათავისუფლებს. მათ კვლავ უნდა დაიცვან „ციფრული სერვისების აქტის“ მოთხოვნები, რომლის მიზანიც პლატფორმების უსაფრთხოების გაზრდაა. ფონ დერ ლაიენმა თქვა: „არ ვართ ვალდებული, შევეგუოთ ფუნქციებს, რომლებიც დამოკიდებულებას იწვევს“.