ევროპამ კლიმატზე დაკვირვების ორი თანამგზავრი გაუშვა

ევროპის კოსმოსურმა სააგენტომ (ESA) ორბიტაზე წარმატებით გაიყვანა ორი თანამგზავრი. ისინი კლიმატის ცვლილებასთან დაკავშირებულ ექსტრემალურ ამინდზე დაკვირვებას გააუმჯობესებენ.

რაკეტა Vega-C, რომელსაც Sentinel-3C და Flex გადაჰქონდა, საფრანგეთის გვიანაში, კურუს კოსმოსური ცენტრიდან ორშაბათს, 22:21 საათზე აფრინდა. ეს გრინვიჩის დროით სამშაბათის 01:21 საათი იყო. აფრენიდან ორ საათში ორივე კოსმოსური აპარატი მზესთან სინქრონულ ორბიტაზე გავიდა.

თანამგზავრი Flex (Fluorescence Explorer) მცენარეებზე სიცხის ტალღების გავლენის შესახებ მონაცემებს მოაგროვებს. ის ფოტოსინთეზის დროს მცენარეების მიერ გამოსხივებულ ძალიან სუსტ ფლუორესცენციას დააკვირდება.

ეს ფლუორესცენცია აჩვენებს, რამდენად ეფექტიანად გარდაქმნის მცენარეული საფარი მზის სინათლესა და ნახშირორჟანგს ენერგიად.

ევროპის კოსმოსური სააგენტოს ცნობით, თანამგზავრის მიერ შეგროვებული მონაცემები „მეცნიერებს მცენარეთა ჯანმრთელობის, ეკოსისტემების პროდუქტიულობის, გარემოს ზეწოლისა და კლიმატის ცვლილების შედეგების შეფასებაში დაეხმარება“.

მისიის ღირებულება 350 მილიონი ევროა (403,5 მილიონი დოლარი). დაგეგმილია, რომ მისია სამი წელი გაგრძელდება.

თანამგზავრი დედამიწას დღეში 14-ჯერ შემოუვლის. ის კონკრეტულ ადგილებს ყოველ 27 დღეში ერთხელ დაუბრუნდება.

თანამგზავრი Sentinel-3C საზღვაო გარემოს შესახებ მონაცემებს შეაგროვებს, მათ შორის, ტემპერატურაზე, ტალღების სიმაღლესა და ოკეანის დინებებზე.

ის მიწათსარგებლობასა და მიწის საფარსაც დააკვირდება. ამის მიზანი მოსავლიანობის გაუმჯობესება და სასურსათო კრიზისების თავიდან აცილებაა.

Sentinel-3C Copernicus-ის ნაწილია. Copernicus ევროკავშირის კოსმოსურ პროგრამაში დედამიწაზე დაკვირვების კომპონენტია.

ევროპის კოსმოსური სააგენტოს დედამიწაზე დაკვირვების პროგრამების დირექტორმა სიმონეტა კელიმ მისიები „არსებითად“ შეაფასა. მისი თქმით, ისინი ხელს შეუწყობს „კლიმატის ცვლილებასთან გამკლავებას, რომელსაც ჩვენ განვიცდით“.