ევროპის ცენტრალურ ბანკებს ოქრო აშშ-დან გააქვთ

ნიდერლანდებისა და საფრანგეთის გადაწყვეტილებები ახალ პრიორიტეტს გამოკვეთს: ოქრო ისეთ ადგილას უნდა ინახებოდეს, საიდანაც ახალი კრიზისის დროს მისი სწრაფად გამოყენება შეიძლება. ცენტრალური ბანკები, მთავრობები და სუვერენული ფონდები ფიზიკურ ოქროს სხვადასხვა ადგილას ინახავენ. მისი გადატანა უკიდურესად რთული, სარისკო და ძვირი შეიძლება იყოს. გაყიდვის ან ვალუტასა და სხვა აქტივებში გაცვლის სიმარტივე კი ადგილმდებარეობაზეა დამოკიდებული.

ტილეტის თქმით, ცენტრალური ბანკები მეტ ყურადღებას უთმობენ არა მხოლოდ აქტივების სახეობას, არამედ მარაგების შენახვის ადგილსაც. მათი მთავარი მიზანი რეზერვების მდგრადობისა და მოქნილობის მაქსიმალურად გაზრდაა.

გოპოლმა აღნიშნა, რომ რეზერვების მართვა „წარმოუდგენლად მნიშვნელოვანი“ გახდა. გადაწყვეტილებები მხოლოდ კონკრეტულ იურისდიქციასთან, მაგალითად აშშ-თან, დაკავშირებულ უარყოფით რისკებს არ ეხება. ბანკებს სურთ, ოქრო სამშობლოსთან ახლოს და სწრაფ სავაჭრო ცენტრში ინახებოდეს.

ნიდერლანდების ცენტრალურმა ბანკმა ოქრო ნიდერლანდებში კი არა, ლონდონში გადაიტანა. გოპოლის თქმით, გაერთიანებული სამეფო „ოქროს ბაზრის ერთ-ერთი ყველაზე ლიკვიდური სავაჭრო ცენტრია“.

გოპოლმა განმარტა: „იდეა ისაა, რომ კრიზისის ან დაძაბულობის დროს ოქროს გამოყენება შესაძლებელი იყოს. ლონდონი პრაქტიკულად ოქროს ბაზრის ცენტრია. იქ იმდენად დიდი აქტივობა და ლიკვიდური ბაზარია, რომ კრიზისის დროს ოქროს სწორედ იქ შენახვა გსურთ“.

ინგლისის ბანკი მსოფლიოში ოქროს ერთ-ერთი მთავარი მფლობელი და შემნახველია. სავარაუდოდ, მას დაახლოებით 400 000 ოქროს ზოდი აქვს, რომელთა ღირებულება დაახლოებით 270 მილიარდი დოლარია (232 მილიარდი ევრო).

ევროპული ორგანიზაციებისთვის ლონდონს საკუთარი უპირატესობები აქვს. თუმცა გადაწყვეტილებებზე ტრამპის პერიოდში აშშ-ის საიმედოობისა და მთლიანად მისი ფინანსური სისტემის მიმართ ეჭვებიც მოქმედებს.

ნორვეგიის უზარმაზარი, 2,3 ტრილიონი დოლარის სუვერენული ფონდის ხელმძღვანელმა გასულ კვირას განაცხადა, რომ ფონდმა აშშ-ის სახაზინო ობლიგაციებში დაბანდებული აქტივები მნიშვნელოვნად უნდა შეამციროს. გადაწყვეტილებას აშშ-ის სახელმწიფო ობლიგაციების ბაზრის გამო შეშფოთება განაპირობებს. მკვეთრი ინფლაცია და სახელმწიფო ვალი სესხების ხარჯს ზრდის და ინვესტორებს აფრთხობს.

ტილეტის თქმით, ოქრო კვლავ მგრძნობიარეა ფედერალური სარეზერვო სისტემის გადაწყვეტილებების მიმართ. აშშ-ის ფინანსული ბაზრების გამო საერთო შეშფოთება ოქროს მფლობელებს აქტივების გადატანისკენ უბიძგებს. ამას ტრამპის განცხადებები გრენლანდიაზე და ევროკავშირის მიმართ შეფარული მუქარაც ემატება.

მიუხედავად ამისა, აშშ და განსაკუთრებით მანჰეტენზე მდებარე ნიუ-იორკის ფედერალური სარეზერვო ბანკი ევროპული ოქროს მნიშვნელოვან ნაწილს კვლავ ინახავს. ეს განსაკუთრებით გერმანიას ეხება. ბუნდესბანკმა 2013-2017 წლებში აშშ-დან გერმანიაში დაახლოებით 300 ტონა ოქრო დააბრუნა, თუმცა იქ ჯერ კიდევ 1 000 ტონაზე ბევრად მეტს ინახავს.

ბუნდესბანკმა გასულ წელს განაცხადა: „ეჭვი არ გვეპარება, რომ ნიუ-იორკის ფედერალური სარეზერვო ბანკი ჩვენი ოქროს მარაგების უსაფრთხოდ შესანახად სანდო და საიმედო პარტნიორია“.

თემებიევროპის ცენტრალურ ბანკებსაშშკენტუკის შტატშილონდონშინიდერლანდებმანიუ-იორკიდანფორტ-ნოქსშიოქრო

გამოქვეყნდა 13 სექტემბერი, 2026