FDA-მ ციკლოსპორის ეპიდაფეთქება დასრულებულად გამოაცხადა

აშშ-ის ჯანდაცვის ფედერალურმა უწყებებმა ქვეყნის ისტორიაში ციკლოსპორით საკვებით მოწამვლის ყველაზე დიდი ეპიდაფეთქება დასრულებულად გამოაცხადეს. თუმცა კვლავ უცნობია, როგორ მოხვდა დაავადების გამომწვევი პარაზიტი სურსათის მიწოდების ჯაჭვში.

რამდენიმე შტატში გავრცელებულ ეპიდაფეთქებას თითქმის 13 000 შემთხვევა დაუკავშირდა. ეს მიმდინარე წელს პარაზიტული დიარეული დაავადების უპრეცედენტო მატების შემთხვევათა უმრავლესობაა.

აშშ-ის სურსათისა და მედიკამენტების ადმინისტრაციის (FDA) ოფიციალურმა პირებმა პარასკევს განაცხადეს, რომ ამ ეპიდაფეთქებასთან დაკავშირებული, ბაზრიდან გამოთხოვილი აისბერგის სალათა სრულად ამოიღეს გაყიდვიდან.

მიუხედავად იმისა, რომ ეპიდაფეთქება დასრულებულად მიიჩნიეს, რამდენიმე საკითხი, მათ შორის მისი წარმოშობა, კვლავ გაურკვეველია. პარაზიტი ადამიანის განავლით ვრცელდება. ამიტომ კვლავ უცნობია, როგორ შეიძლებოდა კანალიზაციას იმდენი საკვები დაებინძურებინა, რომ ამდენი ადამიანი გამხდარიყო ავად.

ჩრდილოეთ კაროლინის სახელმწიფო უნივერსიტეტის სურსათის უვნებლობის პროგრამა Safe Plates-ის საზოგადოებასთან ურთიერთობის დირექტორმა ელენ შუმეიკერმა თქვა: „ასეთი დაბინძურება შეიძლება მოხდეს, თუ პროდუქტი დაბინძურებულ ნიადაგში იზრდება ან დაბინძურებულ წყალთან შეხება აქვს“.

1 მაისიდან მთავრობამ ლაბორატორიულად დადასტურებული თითქმის 20 000 შემთხვევის შესახებ მიიღო ინფორმაცია. ეს გასული წლის იმავე პერიოდში აღრიცხულ რაოდენობაზე თექვსმეტჯერ მეტია. ასევე აღირიცხა 6 100-ზე მეტი სავარაუდო შემთხვევა.

მანამდე აშშ-ში ინფექციების მხრივ ყველაზე მძიმე 2019 წელი იყო. მაშინ ქვეყნის მასშტაბით დაავადების დაახლოებით 4 700 შემთხვევა აღირიცხა.

მიმდინარე წლის მატების ძირითადი მიზეზი 21 შტატში გავრცელებული ეპიდაფეთქება იყო, რომელიც აისბერგის სალათას დაუკავშირდა. თუმცა ათასობით სხვა შემთხვევის კავშირი ამ ეპიდაფეთქებასთან ვერ დადგინდა.

ყველაზე მეტად მიჩიგანის შტატი დაზარალდა. იქ ყველაზე მეტი შემთხვევა და ეპიდაფეთქებასთან დაკავშირებული ორივე გარდაცვალება აღირიცხა.

აშშ-ის დაავადებათა კონტროლისა და პრევენციის ცენტრების (CDC) ცნობით, ციკლოსპორა მიკროსკოპული, სფერული პარაზიტია. ის ხშირად წყლიან დიარეას იწვევს „ხშირი და ზოგჯერ ფეთქებადი დეფეკაციით“. ეპიდაფეთქებები ყველაზე ხშირად გვიან გაზაფხულსა და ზაფხულში ხდება.

დაავადება, რომელსაც ციკლოსპორიაზი ეწოდება, ნაკლებად გავრცელებულია, ვიდრე სხვა მიკრობებით, მათ შორის სალმონელათი და ნაწლავის ჩხირით, გამოწვეული საკვებით გადამდები დაავადებები. მრავალი შემთხვევის დაკავშირება კონკრეტულ საკვებთან ან სხვა წყაროსთან ვერ ხერხდება.