გაეროს ბიომრავალფეროვნების კონფერენციაზე შეთანხმებას მიაღწიეს

როგორ უნდა დავიცვათ სახეობრივი მრავალფეროვნება? ამ საკითხზე გაეროს ბიომრავალფეროვნების კონფერენციაზე ინტენსიური მოლაპარაკებები გაიმართა. საბოლოოდ, სომხეთში შეთანხმებას მიაღწიეს, თუმცა ის განსაკუთრებით ამბიციური არ ყოფილა.

მთელი ღამის მოლაპარაკებების შემდეგ სომხეთში გამართულ გაეროს ბიომრავალფეროვნების კონფერენციაზე შეთანხმება მაინც შედგა. თუმცა საბოლოო დოკუმენტებში ფორმულირებები შეარბილეს და ზოგიერთი მონაკვეთი კვლავ ამოიღეს.

ბევრი საკითხი, მათ შორის, რუსეთმა დაბლოკა. უთანხმოება გამოიწვია, მაგალითად, ადამიანის უფლებებზე, კლიმატისთვის საზიანო სუბსიდიებსა და გაეროს ღია ზღვის დაცვის შეთანხმებაზე მითითებებმა. ბოლო წუთამდე მსჯელობდნენ კომპრომისზე, რომელიც მკვიდრ მოსახლეობას გადაწყვეტილებებში მონაწილეობის უფლებას მიანიჭებდა. ასევე მიიღეს დოკუმენტი, რომელშიც განსაზღვრულია სტრატეგიები, თუ როგორ უნდა დაჩქარდეს 2030 წლამდე სახეობების დაცვის მიზნების შესრულება.

გაეროს კონფერენციის თანახმად, 2030 წლამდე დედამიწის 30% დაცულ ტერიტორიად უნდა გამოცხადდეს. თუმცა, საკმარისია ეს?

ზოგიერთმა გარემოსდაცვითმა ორგანიზაციამ შვება იგრძნო, რომ საბოლოო დოკუმენტებზე შეთანხმება საერთოდ მოხერხდა. თუმცა ორგანიზაციები და მეცნიერები მიღებულ გადაწყვეტილებებს მთლიანობაში ნაკლებად ამბიციურად აფასებენ.

ორგანიზაცია „ფაუნა ენდ ფლორას“ წარმომადგენელმა, კეტრინ უელერმა AFP-ს განუცხადა, რომ შეთანხმება განსაკუთრებით შთამბეჭდავი ან დეტალური არ ყოფილა. WWF International-ის წარმომადგენელმა, კირსტი ლეონგმა, შედეგს ძლიერი და სუსტი მხარეების მქონე, მთლიანობაში კი დადებითად შესაფასებელი უწოდა.

გერმანია ცდილობდა, უფრო მეტმა ქვეყანამ გადაიხადოს ღარიბ ქვეყნებში ბუნების დაცვის ხარჯები, მაგალითად, სპარსეთის ყურის ქვეყნებმა, რომლებიც ბოლო ათწლეულებში გამდიდრდნენ. თუმცა საბოლოო ტექსტი ქვეყნებს მხოლოდ ნებაყოფლობითი შენატანებისკენ მოუწოდებს.

COP17-ზე თითქმის 200 ქვეყნის წარმომადგენლები მსჯელობენ, კვლავ შესაძლებელია თუ არა ბიომრავალფეროვნების მიზნების მიღწევა.

გაეროს ბიომრავალფეროვნების კონფერენცია ორ წელიწადში ერთხელ იმართება. მომდევნო შეხვედრას 2028 წელს ეკვადორი უმასპინძლებს. სამხრეთამერიკულმა ქვეყანამ ფარული კენჭისყრით პანამას მცირე უპირატესობით აჯობა. ეკვადორმა 55 ხმა მიიღო, პანამამ კი 53.

ბიოლოგიური მრავალფეროვნების შესახებ გაეროს კონვენციის დაახლოებით 200 მონაწილე ქვეყანა კონფერენციებზე სახეობების გადაშენებისა და ბუნებრივი საარსებო გარემოს დაკარგვის წინააღმდეგ ზომებზე მსჯელობს. მასპინძელი ქვეყანა კონფერენციას აწყობს და მოლაპარაკებებს უძღვება. ეს შეხვედრები გაეროს ყოველწლიური კლიმატის კონფერენციებისგან დამოუკიდებლად იმართება.