გაერთიანებულმა სამეფომ და საფრანგეთმა მიგრანტების გაცვლის შეთანხმება შეწყვიტეს

გაერთიანებული სამეფოს მთავრობამ ოთხშაბათს განაცხადა, რომ საფრანგეთთან საპილოტე პროგრამა შეწყდა. ის მცირე ნავებით ლა-მანშის სრუტის გადამკვეთი მიგრანტების რაოდენობის შეზღუდვას ისახავდა მიზნად.

გაერთიანებული სამეფოს შინაგან საქმეთა სამინისტრომ (Home Office) განცხადებაში აღნიშნა, რომ პრინციპით „ერთი შედის, ერთი გადის“ დადებული შეთანხმების ფარგლებში ახალ საქმეებს აღარ განიხილავენ.

გეგმის თანახმად, სრუტის სახიფათო გზით გაერთიანებულ სამეფოში ჩასული ადამიანები შეიძლებოდა დაეკავებინათ და საფრანგეთში დაებრუნებინათ. სანაცვლოდ, უსაფრთხო და კანონიერი გზით განმცხადებელი თავშესაფრის მაძიებლების იმავე რაოდენობას მიიღებდნენ.

შეთანხმება 2025 წელს გაერთიანებული სამეფოს ყოფილმა პრემიერ-მინისტრმა კირ სტარმერმა დადო. ამ გზით ის ბრექსიტის შემდეგ პარიზსა და ლონდონს შორის ურთიერთობების განახლებას ცდილობდა. შეთანხმებას მეზობლებს შორის დაძაბულობის ერთ-ერთი მთავარი მიზეზი უნდა შეემსუბუქებინა.

ფრანგული ყოველდღიური გამოცემა ლე მონდის ცნობით, სტარმერის მემკვიდრე ენდი ბერნემი (Andy Burnham) სექტემბრის მოლაპარაკებებისას ემანუელ მაკრონს შეთანხმების შენარჩუნებისკენ მოუწოდებდა. თუმცა გამოცემა წერდა: „პარიზი მიგრაციული ნაკადების კონტროლთან დაკავშირებული თანამშრომლობის დასრულებას ჩქარობდა“.

გაერთიანებული სამეფოს შინაგან საქმეთა მინისტრმა შაბანა მაჰმუდმა (Shabana Mahmood) ამ თვეში პარლამენტში აღიარა: „შეთანხმება სირთულეების გარეშე არ განხორციელებულა“ და „რიცხვები კვლავ შედარებით მცირეა“.

მაჰმუდმა დასძინა: „ოპერაციული თვალსაზრისით უფრო რთული აღმოჩნდა ყოველ კვირას საფრანგეთის სისტემაში დაბრუნებულთა რაოდენობის მკვეთრად გაზრდა“.

შინაგან საქმეთა სამინისტროს მონაცემებით, შეთანხმების ფარგლებში 2025 წლის აგვისტოდან 2026 წლის ივნისამდე საფრანგეთიდან გაერთიანებულ სამეფოში დაახლოებით 1 117 თავშესაფრის მაძიებელი ჩავიდა. ამავე პერიოდში 1 087 ადამიანი გააძევეს. თავდაპირველად შეთანხმება 2 600 გაცვლას ითვალისწინებდა და სამი წელი უნდა გაგრძელებულიყო. თუმცა მხარეებს მისი ვადამდე შეწყვეტის უფლება ჰქონდათ.

შინაგან საქმეთა სამინისტრომ განაცხადა: „საფრანგეთთან ერთად მცირე ნავებით გადასვლის წინააღმდეგ დაუღალავად ვაგრძელებთ მუშაობას და რეალურ პროგრესს მივაღწიეთ“.

სამინისტროს ცნობით, მართალია, პროგრამის ფარგლებში ახალ საქმეებს აღარ განიხილავენ, მაგრამ უკვე დაკავებულთა გასაძევებელი ფრენები მომავალ კვირებში გაგრძელდება.

წელს სრუტის გადამკვეთ ადამიანთა რაოდენობა სხვადასხვა მიზეზით მკვეთრად შემცირდა. მათ შორისაა პოლიციის პატრულირების გახშირება და ჩრდილოეთ საფრანგეთში მეთვალყურეობის გაძლიერება.