ღაზაში ომით დაზიანებული შენობის ჩამონგრევას სულ მცირე 12 ადამიანი ემსხვერპლა

ვიდეოკადრებში ჩანს, რომ ღაზის ქალაქის თალ ალ-ჰავის რაიონში მრავალსართულიანი შენობის ნანგრევებში ცხედრებსა და გადარჩენილებს კვლავ ეძებენ. შენობის სართულები ერთმანეთზეა ჩაწოლილი.

ადგილობრივების თქმით, უსაფრთხოების შესახებ გაფრთხილებების მიუხედავად, ბინებში 10 ოჯახი ცხოვრობდა.

ჰამასის მიერ მართული სამოქალაქო თავდაცვის სამაშველო სამსახურის წევრებმა განაცხადეს, რომ თავდაპირველად „ცარიელი ხელებით“ მუშაობდნენ. ამის მიზეზი ისრაელის მიერ ღაზაში აღჭურვილობის შეტანაზე დაწესებული მკაცრი შეზღუდვები იყო. თუმცა მოგვიანებით მათ რამდენიმე მძიმე დანადგარი ითხოვეს.

ჯანდაცვის სფეროს ოფიციალური პირებისა და ჰამასის წყაროების ცნობით, სამშაბათს ღაზაში ისრაელის საჰაერო დარტყმებს სულ მცირე ხუთი პალესტინელი ემსხვერპლა. დაღუპულებს შორის ორი ბავშვი და ჰამასის მეთაური იყვნენ.

ისრაელის სამხედრო ძალებმა განაცხადეს, რომ სამხრეთ ღაზაში ჰამასის მეთაური, ხოლო ჩრდილოეთში კიდევ ერთი მებრძოლი მოკლეს. გავრცელებული ცნობით, ორივე შემთხვევაში ბავშვიც დაიღუპა.

ცალკე, ბრიტანულმა საქველმოქმედო ორგანიზაციამ „სამედიცინო დახმარება პალესტინელებისთვის“ (Medical Aid for Palestinians) განაცხადა, რომ ჩრდილოეთ ღაზის ჯაბალიაში მის მიერ მხარდაჭერილ სამედიცინო ცენტრში პაციენტი ისრაელის დრონმა მოკლა.