ირანი სარაკეტო ბაზებთან მშენებლობას აწარმოებს

ირანი, როგორც ჩანს, მნიშვნელოვან ახალ მშენებლობას აწარმოებს სულ მცირე ორ მსხვილ სარაკეტო ობიექტთან და არემონტებს ბაზებს, რომლებიც აშშ-ისა და ისრაელის თვეების განმავლობაში განხორციელებული საჰაერო დარტყმების შედეგად დაზიანდა. ასეთ დასკვნამდე სატელიტური სურათების ანალიზი მიდის.

ბრიტანული სადაზვერვო კომპანია MAIAR-ის ანალიტიკოსებმა, რომლებმაც ფოტოები შეისწავლეს, BBC Verify-ს განუცხადეს, რომ ნოემბერში გადაღებულ სატელიტურ სურათებზე ჩანს გათხრები და ახალი შენობები. სურათები თეირანის მახლობლად, ქარაჯში მდებარე გარმდარეჰის სამხედრო ბაზას და ჩრდილოეთში მდებარე შაჰრუდის ბაზას ასახავს.

სულ მცირე 12 სხვა სამხედრო ობიექტზეც, მათ შორის სარაკეტო კომპლექსებსა და საჰაერო ბაზებზე, შეკეთების ნიშნები ჩანს. დასავლეთ ირანში, ერაყის საზღვართან მდებარე ქერმანშაჰის სარაკეტო ბაზაზე დანგრეულ შენობებს ახალი სახურავები გაუკეთეს. დედაქალაქის აღმოსავლეთით, ფარჩინის სამხედრო კომპლექსში კი დაზიანებული შენობები და ნანგრევები გაწმინდეს. კომპლექსი საჰაერო დარტყმების არაერთი სერიის მიუხედავად, განმეორებით შეაკეთეს.

ირანზე მომუშავე CIA-ის ყოფილმა ანალიტიკოსმა ჯიმ ლამსონმა თქვა, რომ შაჰრუდთან გათხრები შესაძლოა რაკეტების წარმოებას უკავშირდებოდეს. მისი თქმით, რადგან შაჰრუდის ახლომდებარე საჰაერო ბაზა ბოლო წლებში არაერთხელ გახდა სამიზნე, ისლამური რევოლუციის გვარდიის კორპუსი, სავარაუდოდ, წარმოების მიწისქვეშ გადატანის გზებს ეძებს.

MAIAR-ის ერთ-ერთმა ანალიტიკოსმა აღნიშნა, რომ ირანს „ინფრასტრუქტურის მიწისქვეშ გადატანის პრაქტიკა აქვს, რათა ის შემდგომი დარტყმებისგან დაიცვას“. ირლანდიის სამხედრო ძალების ყოფილმა ხელმძღვანელმა და თავდაცვის ანალიტიკოსმა, მარკ მელეტმა თქვა, რომ მიწისქვეშა ობიექტების მშენებლობას დამატებითი უპირატესობაც აქვს: უცხოელი დამკვირვებლებისთვის „უფრო რთულია, შეაფასონ მათი მასშტაბი და ოპერაციული მდგომარეობა“.

ბოლო კვირებში გაიზარდა ვარაუდები, რომ აშშ-მა შესაძლოა ირანზე იერიშები განაახლოს ამ კვირის დასაწყისში ჩატარებული შუალედური არჩევნების შემდეგ. თუმცა, ოთხშაბათს ვიცე-პრეზიდენტმა ჯეი დი ვენსმა რესპუბლიკელების ცუდი შედეგი ამ კვირის არჩევნებში ომის ამომრჩევლებში არაპოპულარულობით ახსნა. მან თქვა, რომ ამან შესაძლოა მის პარტიას სენატზე კონტროლი „მომდევნო 6 წლის განმავლობაში“ დააკარგვინოს.

ქვეყნის სხვადასხვა ბაზაზე ირანის ძალები მცირე მასშტაბის სარემონტო სამუშაოებს ატარებენ. ეს კომპლექსები აშშ-ისა და ისრაელის ომის დაწყებიდან მოყოლებული, საჰაერო დარტყმებმა მძიმედ დააზიანა.

ანალიტიკოსების თქმით, სატელიტური სურათები, როგორც ჩანს, აჩვენებს, რომ ფარჩინის სამხედრო კომპლექსში, თალეგან 2-ის ობიექტზე, მნიშვნელოვანი მშენებლობა დასრულდა. დაზიანებული შენობები გაასწორეს, ხოლო მიწისქვეშა ბუნკერზე თავდასხმის შედეგები შეაკეთეს და ბეტონით გაამაგრეს.