ირანის ომში მეტი ამერიკელი სამხედრო დაიღუპა, ვიდრე მთავრობა იუწყება

ახალი ანგარიშის თანახმად, ირანის ომში უფრო მეტი ამერიკელი სამხედრო დაიღუპა, ვიდრე პრეზიდენტ დონალდ ტრამპის მთავრობამ გაამჟღავნა.

პენტაგონის შიდა მონაცემებს გაცნობილმა აშშ-ის ხუთმა ოფიციალურმა პირმა ვაშინგტონ პოსტს (The Washington Post) განუცხადა, რომ კონფლიქტში სულ მცირე 22 სამხედრო მოსამსახურე დაიღუპა.

ვაშინგტონ პოსტის ცნობით, ეს შეფასება ოთხით აღემატება სამხედრო მოსამსახურეთა დაღუპვის 18 შემთხვევას, რომლებიც თავდაცვის დანაკარგების ანალიზის სისტემის სახელით ცნობილ საჯარო სამთავრობო მონაცემთა ბაზაში გამოქვეყნდა.

ინდეპენდენტმა (The Independent) კომენტარისთვის პენტაგონსა და აშშ-ის ცენტრალურ სარდლობას მიმართა. ცენტრალური სარდლობა ახლო აღმოსავლეთში სამხედრო ოპერაციებს ატარებს.

აშშ-ის მეექვსე ოფიციალურმა პირმა ვაშინგტონ პოსტს უთხრა, რომ ომის დროს ახლო აღმოსავლეთში 23 სამხედრო დაიღუპა. თუმცა, მან აღნიშნა, რომ გაუმჟღავნებელი შემთხვევებიდან ყველა კონფლიქტს პირდაპირ არ უკავშირდება.

პარასკევის მდგომარეობით, პენტაგონის მონაცემთა ბაზაში აშშ-ის სამხედრო კამპანიის დროს მტრული მოქმედებით გამოწვეული შვიდი და არამტრული მიზეზით გამოწვეული შვიდი სიკვდილი იყო აღრიცხული. ირანის წინააღმდეგ ამ კამპანიას პენტაგონმა „ოპერაცია ეპიკური რისხვა“ უწოდა.

მტრული მოქმედებით გამოწვეული კიდევ ოთხი სიკვდილი ცალკე კატეგორიაში, „საზღვარგარეთის ოპერაციებში“ აღრიცხეს. ეს კატეგორია 7 ივლისს გაიხსნა, დაახლოებით იმ დროს, როცა აშშ-სა და ირანს შორის მყიფე ცეცხლის შეწყვეტა დაირღვა.

ირანის ომის დაწყების შემდეგ, ორივე პარტიის კანონმდებლებმა შეშფოთება გამოთქვეს იმ ზიანის გამო, რომელსაც კონფლიქტი სამხედროებს მიაყენებს.

სამხრეთ კაროლინელმა რესპუბლიკელმა წარმომადგენელმა ნენსი მეისმა მარტში განაცხადა: „ვაშინგტონის საომარი მანქანა ცდილობს, ირანი კიდევ ერთ ერაყად აქციოს. ჩვენი სამხედროები კიდევ ერთი დაუსრულებელი ომისთვის არ უნდა გამოიყენონ“.

ივლისში ტრამპი ახლო აღმოსავლეთში დაღუპული ოთხი სამხედრო მოსამსახურის ცხედრების საპატიო გადმოსვენებას დაესწრო. ომის დაწყების შემდეგ პრეზიდენტი ასეთ ცერემონიას მესამედ დაესწრო.

დელავერში, დოვერის საჰაერო ძალების ბაზაზე, სამხედროების ცხედრებიანი ოთხი კუბო თვითმფრინავიდან ჩამოიტანეს, ტრამპმა კი მათ სამხედრო სალამი მისცა.

დოვერში გამგზავრებისას ტრამპმა ჟურნალისტებს უთხრა, რომ ცერემონიაზე დასწრება „ერთ-ერთი ყველაზე რთული რამაა, რაც პრეზიდენტმა უნდა გააკეთოს“.

პრეზიდენტმა თქვა: „აქ არანაირი თამაში და სხვა არაფერი არ არის, ეს მათი შვილია. ერთადერთი, რაც შეგიძლია, მთელი გულით თანაუგრძნო“.