ისრაელელმა ახალმოსახლეებმა პალესტინური კაფე დროშებით დაფარეს

ყავის მაღაზია პატარა სოფელ ლუბან ალ-შარქიაში მდებარეობს. ის დასავლეთ სანაპიროს ჩრდილოეთ და სამხრეთ ნაწილებს შორის დამაკავშირებელ მთავარ გზასთანაა. გზით პალესტინელებიც და ტერიტორიაზე მცხოვრები დაახლოებით 500 000 ისრაელელი ახალმოსახლეც სარგებლობენ.

ბოლო წლებში ახალმოსახლეებმა გზის გასწვრივ, სოფლების შესასვლელებთან და პალესტინურ ღირსშესანიშნაობებთან დროშები აღმართეს. ზოგიერთი მათგანი პალესტინელთა წინააღმდეგ ძალადობისა და დაშინების კამპანიას აწარმოებდა, რათა ისინი საკუთარი მიწიდან განედევნა.

მუეიიდ ჰუსეინი ხუთშაბათ დილით ყავის მაღაზიის გასახსნელად მივიდა. მან აღმოაჩინა, რომ ახალმოსახლეებმა შესასვლელთან ისრაელის ათობით დროშა მჭიდროდ აღმართეს. დროშებმა მაღაზია სამხრეთის მიმართულებით მიმავალი მგზავრებისთვის დაფარა.

„ისინი თავს არ გვანებებენ. ჩემი მაღაზიის ხედი გადაკეტეს“, თქვა ლუბან ალ-შარქიის ყავის მაღაზიისა და დასასვენებელი ადგილის მფლობელმა ჰუსეინმა.

როიტერსის მიერ ჰუსეინის გამოკითხვისას იქ მანქანით ახალმოსახლემ ჩაიარა. ჰუსეინის თქმით, დროშები სწორედ მან აღმართა. კაცი ჰუსეინსა და მაღაზიას მობილური ტელეფონით იღებდა. როიტერსმა მასთან კომენტარისთვის დაკავშირება ვერ შეძლო.

ჰუსეინმა თქვა: „ის მიდის, შემდეგ კი ბრუნდება და ამოწმებს, რომელიმე დროშა ხომ არ მოვხსენი. ამბობს, რომ დაბრუნდება და ჩემს მაღაზიას დახურავს“.

ისრაელის სამხედრო უწყებას დროშების განთავსების შესახებ კომენტარის მოთხოვნაზე დაუყოვნებლივ არ უპასუხია.

გაეროს ორგანოები და ქვეყნების უმეტესობა ისრაელის დასახლებებსა და ახალმოსახლეთა ფორპოსტებს უკანონოდ მიიჩნევენ. მათი შეფასება სამხედრო ოკუპაციის შესახებ საერთაშორისო სამართალს ეფუძნება. ისრაელი ამ პოზიციას უარყოფს და ტერიტორიას სადავოდ მიიჩნევს, არა ოკუპირებულად.

დასავლეთ სანაპიროზე მკვეთრად გაიზარდა ახალმოსახლეთა ძალადობა პალესტინელების წინააღმდეგ. გახშირდა მათ მიერ პალესტინური მიწებისა და რესურსების ხელში ჩაგდებაც. სამხედრო უწყება აცხადებს, რომ ძალადობის აღსაკვეთად ყველაფერს აკეთებს, რაც შეუძლია. პალესტინელები ამას უარყოფენ და მიუთითებენ მრავალ შემთხვევაზე, როცა თავდასხმების დროს სამხედროები უმოქმედოდ რჩებიან.