კატარის პრემიერ-მინისტრმა ღაზაში ისრაელის ქმედებები დაგმო

შეიხ მუჰამედმა, რომელიც კატარის საგარეო საქმეთა მინისტრიცაა, ეს განცხადება სამშაბათს გადაცემაში „პირს მორგანი ცენზურის გარეშე“ (Piers Morgan Uncensored) გააკეთა. მას ღაზის სექტორში ისრაელის ქმედებების ხასიათზე ჰკითხეს.

მან 2023 წლის 7 ოქტომბერს ჰამასის ხელმძღვანელობით ისრაელზე თავდასხმას „ხოცვა-ჟლეტა“ უწოდა, რომელიც „უნდა დაიგმოს“. შეიხ მუჰამედმა თავდასხმის მონაწილეების პასუხისმგებლობის საკითხის დაყენება მოითხოვა, თუმცა ისრაელის პასუხი გაუმართლებლად შეაფასა.

მან დასძინა: „საავადმყოფოები სამიზნედ იქცა, სკოლები სამიზნედ იქცა. როგორიც უნდა იყოს განმარტებები და არგუმენტები, ამას ვერაფერი გაამართლებს“.

შეიხ მუჰამედმა ისრაელი იმ „ცეცხლის შეწყვეტის“ შეთანხმების თითქმის ყოველდღიურ დარღვევებშიც გააკრიტიკა, რომელიც 2025 წლის ოქტომბერში ამოქმედდა. მისი თქმით, მას შემდეგ ღაზის სექტორში 1 400-ზე მეტი პალესტინელი დაიღუპა.

მან თქვა: „ოკუპირებული ტერიტორია გაიზარდა. სექტორის თითქმის 70 პროცენტი ოკუპირებულია და ისრაელის ძალები იქ შესვლის უფლებას არ იძლევიან. ისინი ამ შეთანხმებით ნაკისრ ვალდებულებებს არ ასრულებენ. ეს მხოლოდ აჩვენებს, რომ მათ სხვა განზრახვები აქვთ“.

შეიხ მუჰამედის თქმით, ომის პირველივე დღიდან ისრაელი ცეცხლის შეწყვეტის შუამავლობისთვის კატარის ძალისხმევას არაერთხელ „ძირს უთხრიდა“.

მან ასევე დაგმო 2025 წელს ისრაელის დარტყმა კატარის დედაქალაქ დოჰაზე. სამიზნე ჰამასის მაღალი რანგის წარმომადგენლები იყვნენ, რომლებიც მოლაპარაკებებისთვის შეიკრიბნენ. თავდასხმამ სასიკვდილო აფეთქება გამოიწვია და კატარის სუვერენიტეტი უპრეცედენტოდ დაარღვია.

მან თქვა: „ისრაელი თავს დაგვესხა, როცა შუამავლობას ვეწეოდით და იმ დროს დოჰაში ტრამპის წინადადების წინ წაწევას ვცდილობდით. ეს მიუღებელი იყო და დაიგმო. ამით იქმნება შუამავალზე თავდასხმის პრეცედენტი, რაც ომების ისტორიაში არასდროს მომხდარა“.

შეიხ მუჰამედმა აშშ-ის პრეზიდენტ დონალდ ტრამპზე მიუთითა. მან დასძინა: „ისრაელის პრემიერ-მინისტრმა ბენიამინ ნეთანიაჰუმ ზღვარი გადაკვეთა, ისევე, როგორც მანამდე სხვა ზღვრები გადაკვეთა“.

შეიხ მუჰამედის თქმით, შუამავლის როლის შესრულება ადვილი არ ყოფილა, თუმცა მას მშვიდი დიპლომატია წინსვლის ყველაზე ეფექტიან გზად მიაჩნია.

კატარი, პაკისტანთან ერთად, აშშ-სა და ირანს შორისაც შუამავლის როლს ასრულებს. ეს ძალისხმევა ირანის წინააღმდეგ აშშ-ისა და ისრაელის ომის დაწყებას მოჰყვა.

მან თქვა: „ყველაფერს ვაკეთებთ, რათა აშშ-ის მთავრობას საუკეთესო რჩევა მივცეთ, თუ როგორ შეიძლება გამოსავლის პოვნა. იმავეს ვაკეთებთ ირანელებისთვისაც“.