Meta-მ მოზარდთან დავა პროცესის დაწყების შემდეგ მოაგვარა

Meta Platforms-მა მოზარდ მოსარჩელესთან დავა მოაგვარა. მოზარდი კომპანიას Instagram-ისა და Facebook-ის ისე დაპროექტებაში ადანაშაულებდა, რომ მომხმარებლებს მათზე დამოკიდებულება გასჩენოდათ და ამის შედეგად ფსიქიკური ჯანმრთელობის პრობლემები და კვებითი დარღვევები განვითარებოდა. ამის შესახებ მოსარჩელის ადვოკატებმა პარასკევს განაცხადეს.

დავის მოგვარება ოთხშაბათს ნაფიც მსაჯულთა შერჩევის დაწყების შემდეგ მოხდა. სასამართლო პროცესზე Meta-სა და Snapchat-ის მფლობელი Snap Inc.-ის წინააღმდეგ ორი მოზარდის, ინიციალებით S.J.-ისა და K.D.B.-ის, ბრალდებები უნდა განხილულიყო. Meta-მ S.J.-თან დავა პროცესამდე რამდენიმე დღით ადრე მოაგვარა. პარასკევს K.D.B.-თან მიღწეული შეთანხმების შემდეგ, სავარაუდოდ, პროცესი მხოლოდ Snap-ის წინააღმდეგ გაგრძელდება.

K.D.B.-ის ადვოკატმა ემილი ჯეფკოტმა განცხადებაში აღნიშნა: „ჩვენ კვლავაც ერთგული ვართ, გავაუმჯობესოთ ბავშვების უსაფრთხოება სოციალური მედიის აპებში და ტექნოლოგიური კომპანიები პასუხისმგებლობის წინაშე დავაყენოთ. მოხარულები ვართ, რომ ჩვენი კლიენტის სახელით ეს საკითხი სამართლიანად მოვაგვარეთ“.

ეს ლოს-ანჯელესის შტატის სასამართლოში მეორე პროცესია, რომელიც ახალგაზრდების სარჩელებს ეხება. ისინი ამბობენ, რომ Meta-მ, Snap-მა, TikTok-მა და Alphabet-ის YouTube-მა პლატფორმები იძულებითი მოხმარების წასახალისებლად შექმნეს, რის შემდეგაც ახალგაზრდები სოციალურ მედიაზე დამოკიდებული გახდნენ.

S.J.-სა და K.D.B.-ს TikTok-სა და YouTube-თან დავებიც მანამდე ჰქონდათ მოგვარებული.

ათასობით მიმდინარე სარჩელიდან ეს საქმე სატესტოდ შეარჩიეს. ნაფიც მსაჯულთა ვერდიქტმა შესაძლოა გავლენა მოახდინოს იმაზე, როგორ მოაგვარებენ კომპანიები და მოსარჩელეები მსგავს საქმეებს.

ილინოისელი 16 წლის გოგონა S.J. და მისისიპელი 18 წლის K.D.B. ამბობენ, რომ YouTube-ის გამოყენება 3 წლიდან დაიწყეს, სხვა პლატფორმების კი დაახლოებით 9 წლიდან. მათი თქმით, ისეთი ფუნქციების გამო, როგორიცაა ვიდეოების ავტომატური ჩართვა და უსასრულო გადახვევა, მათ იძულებითი ჩვევები ჩამოუყალიბდათ.

კომპანიები უარყოფენ ბრალდებას, რომ მათი პლატფორმები ახალგაზრდების დამოკიდებულების გამოსაწვევად შეიქმნა. მათი თქმით, მათ ზომები მიიღეს, რათა აპები ახალგაზრდებისთვის საკუთარი თავის გამოხატვის უსაფრთხო სივრცეებად ექციათ.

სოციალური მედიის კომპანიებს ფედერალურ და შტატების სასამართლოებში ათასობით სარჩელი აქვთ წარდგენილი. მოსარჩელეები არიან კერძო პირები, სასკოლო ოლქები, მუნიციპალიტეტები და სხვა სამთავრობო უწყებები. ისინი ამტკიცებენ, რომ კომპანიები შეგნებულად ცდილობდნენ ბავშვების პლატფორმებზე დამოკიდებულების გამოწვევას, რამაც ახალგაზრდებში ფსიქიკური ჯანმრთელობის კრიზისს, მათ შორის შფოთვას, დეპრესიასა და თვითმკვლელობას, შეუწყო ხელი.