ნაზერის საავადმყოფოზე ისრაელის დარტყმას სულ მცირე ექვსი ადამიანი ემსხვერპლა

სამხრეთ ღაზაში, ნასერის საავადმყოფოს შენობაზე ისრაელის საჰაერო დარტყმის შედეგად სულ მცირე ექვსი ადამიანი დაიღუპა, განაცხადა ჰამასის მიერ კონტროლირებული სამოქალაქო თავდაცვის უწყების წარმომადგენელმა.

დარტყმა ხან იუნისში მდებარე საავადმყოფოს ქირურგიულ განყოფილებას მოხვდა. სააგენტო AFP-ს სპიკერმა მაჰმუდ ბასალმა განუცხადა, რომ სულ მცირე 20 ადამიანი დაიჭრა და საავადმყოფო მნიშვნელოვნად დაზიანდა.

გავრცელებული ცნობით, ხუთშაბათს გამთენიისას დარტყმის შედეგად დაღუპულთა შორის ქირურგიც იყო.

ისრაელის სამხედროებს მომხდარზე დაუყოვნებლივ კომენტარი არ გაუკეთებიათ. ბი-ბი-სიმ კომენტარისთვის ისრაელის თავდაცვის ძალებს მიმართა.

ისრაელი ბი-ბი-სის ღაზის სექტორიდან დამოუკიდებლად რეპორტაჟების მომზადების საშუალებას არ აძლევს, ამიტომ შემთხვევის დეტალების გადამოწმება ვერ ხერხდება.

ღაზაში აღდგენით სამუშაოებს სამოქალაქო თავდაცვის სამსახური ატარებს, რომელიც ჰამასის მიერ კონტროლირებული შინაგან საქმეთა სამინისტროს დაქვემდებარებაში მუშაობს. სამსახურის ძალისხმევას წითელი ჯვრის საერთაშორისო კომიტეტი (ICRC) უჭერს მხარს.

ნასერის საავადმყოფო, რომელიც სამხრეთ ღაზაში ყველაზე დიდია, 2025 წლის აგვისტოში ისრაელის ორმაგი დარტყმის სამიზნე გახდა. მაშინ სულ მცირე 20 ადამიანი დაიღუპა, მათ შორის ჟურნალისტები და ჯანდაცვის სფეროს თანამშრომლები.

ღაზაზე ისრაელის დარტყმები გასული წლის ოქტომბერში ცეცხლის შეწყვეტის შეთანხმების მიუხედავად გრძელდება. ღაზის ჯანდაცვის სამინისტროს მონაცემებით, მას შემდეგ 1 600-ზე მეტი ადამიანი დაიღუპა. გაერო სამინისტროს მონაცემებს სანდოდ მიიჩნევს.

ისრაელი და ჰამასი ერთმანეთს ცეცხლის შეწყვეტის შეთანხმების დარღვევაში ადანაშაულებენ.

ღაზაში ჰუმანიტარული კრიზისი კიდევ უფრო გაამწვავა ბოლო ხანებში მოსულმა ძლიერმა წვიმებმა. გავრცელებული ცნობით, წყალდიდობამ ათიათასობით კარავი დატბორა, სადაც იძულებით გადაადგილებული ოჯახები ცხოვრობდნენ.

ღაზის ომი 2023 წლის 7 ოქტომბერს სამხრეთ ისრაელზე ჰამასის ხელმძღვანელობით განხორციელებულმა თავდასხმამ გამოიწვია. მაშინ დაახლოებით 1 200 ადამიანი დაიღუპა, 251 კი მძევლად აიყვანეს.

ჯანდაცვის სამინისტროს მონაცემებით, მას შემდეგ ღაზაში 74 645-ზე მეტი ადამიანი დაიღუპა.