ნეთანიაჰუ არაბთა გაერთიანებული საამიროების პრეზიდენტს ფარულად შეხვდა

არაბთა გაერთიანებული საამიროების განცხადებაში ნათქვამია: „მხარეებმა არაბთა გაერთიანებულ საამიროებსა და ისრაელს შორის ორმხრივი ურთიერთობები და მათი განმტკიცებისა და განვითარების გზები განიხილეს“.

ნეთანიაჰუს ოფისმა განაცხადა, რომ ვიზიტის მთავარი თემები ორ ქვეყანას შორის ურთიერთობების განმტკიცება და რეგიონული გამოწვევები იყო.

ფარული ვიზიტი ისრაელის მედიაში გავრცელებული გახმაურებული ცნობიდან რამდენიმე კვირაში შედგა. ამ ცნობის თანახმად, არაბთა გაერთიანებული საამიროების პრეზიდენტმა ნეთანიაჰუ 2023 წლის 7 ოქტომბერს ისრაელზე სასიკვდილო თავდასხმამდე ჰამასის მოსალოდნელი საფრთხის შესახებ გააფრთხილა. ისრაელის პრემიერ-მინისტრს ეს გაფრთხილება უსაფრთხოების სამსახურებისთვის, სავარაუდოდ, არ გადაუცია.

ისრაელის მაუწყებელმა Channel 12-მა ორშაბათს გაავრცელა ინფორმაცია, რომ ნეთანიაჰუს ვიზიტის მიზანი შეიხ მოჰამედისთვის თხოვნა იყო, უარეყო ასეთი გაფრთხილების მიცემა.

ნეთანიაჰუს ოფისმა უარყო, რომ პრემიერ-მინისტრმა მსგავსი თხოვნა გამოთქვა. მან თავდაპირველი ცნობაც უარყო.

ორშაბათს, ნეთანიაჰუს ვიზიტის დადასტურებამდე, ისრაელის შიდა უსაფრთხოების სამსახურმა შინ-ბეთმა (Shin Bet) Channel 12-ის წინააღმდეგ საჩივარი შეიტანა. უწყებამ არხი პრემიერ-მინისტრის ისრაელში დაბრუნებამდე ვიზიტის გაშუქებით ცენზურის წესების დარღვევაში დაადანაშაულა.

ნეთანიაჰუს ოფისის განცხადებაში ნათქვამია: „ამ საღამოს შინ-ბეთმა მთავარ სამხედრო ცენზორს საჩივრით მიმართა და ცენზურის მძიმე დარღვევის გამო Channel 12-ის კანონის სრული სიმკაცრით დასჯა მოითხოვა“.

ოფისმა აღნიშნა, რომ ცნობა მაშინ გავრცელდა, როცა პრემიერ-მინისტრის თვითმფრინავი ჯერ კიდევ ისრაელის საჰაერო სივრცის გარეთ იმყოფებოდა. მისი განცხადებით, ცნობამ პრემიერ-მინისტრის, მისი მეუღლისა და დელეგაციის წევრების სიცოცხლე საფრთხეში ჩააგდო. დელეგაციაში სადაზვერვო სააგენტო მოსადის (Mossad) ხელმძღვანელი და უსაფრთხოების სფეროს სხვა მაღალი რანგის პირებიც შედიოდნენ.

შეიხ მოჰამედის მიერ ნეთანიაჰუს მიღება მნიშვნელოვანი მოვლენა იყო. ახლო აღმოსავლეთში ბევრი ადამიანი ისრაელის ლიდერს ღაზაში ომის მთავარ გამჩაღებლად მიიჩნევს. ამ ომში 70 000-ზე მეტი პალესტინელი დაიღუპა, მათგან ბევრი მშვიდობიანი მოქალაქე იყო.

ეს პირველი შემთხვევაცაა, როცა არაბთა გაერთიანებულმა საამიროებმა ორი ლიდერის შეხვედრა ოფიციალურად აღიარა. მანამდე ქვეყანა მაისში ნეთანიაჰუს ვიზიტის შესახებ ცნობებს უარყოფდა.

არაბთა გაერთიანებული საამიროები იმ რამდენიმე არაბულ ქვეყანას შორისაა, რომლებსაც ისრაელთან ოფიციალური დიპლომატიური ურთიერთობები აქვთ. ქვეყანამ 2020 წელს, აშშ-ის პრეზიდენტ დონალდ ტრამპის პირველი ვადის დროს, აბრაამის შეთანხმებებს მოაწერა ხელი.