NGO: ისრაელი ღაზაში „ყვითელ ხაზს“ აფართოებს

დანიის ლტოლვილთა საბჭომ (Danish Refugee Council, DRC) ანგარიში ხუთშაბათს გამოაქვეყნა. ისრაელზე 7 ოქტომბრის ტერორისტული თავდასხმებიდან, რომლებმაც ღაზაში ომი გამოიწვია, თითქმის სამი წელი გავიდა. ომის დასასრულებლად შემუშავებული, ეტაპობრივი ცეცხლის შეწყვეტის გეგმის ამოქმედებიდანაც ერთი წელი გავიდა. ის 10 ოქტომბერს შევიდა ძალაში.

ანგარიშში წერია: „2025 წლის ოქტომბერში ღაზაში მიღწეულ ცეცხლის შეწყვეტას მშვიდობიანი მოსახლეობის ტანჯვა უნდა დაესრულებინა. თითქმის ერთი წლის შემდეგ, ის მეტწილად მხოლოდ სახელწოდებად რჩება. ღაზაში იძულებითი გადაადგილება არ დასრულებულა, მან მხოლოდ ფორმა შეიცვალა“.

მიგნებები ღაზის ხუთ ადმინისტრაციულ ერთეულში მდებარე შიდა დევნილთა ბანაკების 195 მცხოვრებთან ჯგუფურ განხილვებს ეფუძნება.

ანგარიში სახელწოდებით „წინასწარგანზრახული შეზღუდვა: ღაზაში ხანგრძლივი იძულებითი გადაადგილების ადამიანური ფასი“ ისრაელს ადანაშაულებს, რომ ცეცხლის შეწყვეტის შეთანხმების შემდეგ ხანგრძლივი იძულებითი გადაადგილების პოლიტიკას ატარებს.

DRC-ის თქმით, ამის უზრუნველყოფის ერთ-ერთი საშუალება ე.წ. „ყვითელი ხაზია“. ის აღმოსავლეთ ღაზაში, საზღვართან, ისრაელის სამხედრო ძალების მიერ კონტროლირებულ ტერიტორიას გამოყოფს. ანგარიშის თანახმად, ხაზი სანაპიროსკენ მიიწევს.

ოკუპირებულ პალესტინაში ორგანიზაციის დირექტორმა ალან მოზლიმ განაცხადა: „ასობით ათასი ადამიანის ხანგრძლივ იძულებით გადაადგილებასთან ერთად, ე.წ. ცეცხლის შეწყვეტის მთავარი მახასიათებელი ყვითელი ხაზია. ის დასავლეთისკენ გაფართოებასა და მეტი მიწის შთანთქმას განაგრძობს. შედეგად, ოჯახები ფაქტობრივად ღაზის ტერიტორიის 30%-ში არიან მოქცეული“.

სხვა ორგანიზაციებმა, მათ შორის გაერომ, ასევე გაავრცელეს ინფორმაცია, რომ „ყვითელი ხაზი“ დასავლეთისკენ გადაადგილდება. იგივე დაადასტურა ისრაელის მთავრობამაც, თუმცა ზოგიერთი დეტალი განსხვავდება.

გასულ თვეში ისრაელის პრემიერ-მინისტრმა ბენიამინ ნეთანიაჰუმ განაცხადა, რომ „ყვითელი ხაზის“ შიგნით ღაზის ტერიტორიის 60% ექცევა და არა 70%. მან ასევე თქვა, რომ გეგმა ამ ტერიტორიის გაფართოებას ითვალისწინებს.

DRC-ის ანგარიშში ნათქვამია: „დახმარების ორგანიზაციები აცხადებენ, რომ ხაზიდან რამდენიმე კილომეტრის ფარგლებში მუშაობას ვერ ახერხებენ, რადგან წვდომა შეზღუდულია ან უსაფრთხოებას საფრთხე ემუქრება“.

ანგარიშის თანახმად, ამის გამო სასიცოცხლოდ მნიშვნელოვანი დახმარება და მარაგები საზღვართან მდებარე დევნილთა ბანაკებამდე ვერ აღწევს.

DRC-მ და სოფლის მეურნეობის განვითარების ასოციაციამ (Agricultural Development Association, PARC) არაოფიციალურ კარვებსა და დროებით ბანაკებში მრავალი მნიშვნელოვანი ხარვეზი გამოავლინეს. ისინი ღაზის ნანგრევებში გაჩნდა, სადაც, შეფასებით, ყოველი 10 მცხოვრებიდან რვაზე მეტი ცხოვრობს.