პაკისტანმა ისლამაბადი იმრან ხანის პარტიის მარშის წინ ჩაკეტა

ხელისუფლებამ უკიდურეს ზომებს მიმართა, რათა შაბათ-კვირისთვის დაგეგმილი მარში შეეჩერებინა. პარტია პაკისტანის მოძრაობა სამართლიანობისთვის (Pakistan Tehreek-e-Insaf, PTI) აქციას მას შემდეგ გეგმავს, რაც ხანის მიმართ მოპყრობამ მზარდი შეშფოთება გამოიწვია. ხანი 2023 წლიდან კორუფციის ბრალდებებით პატიმრობაში იმყოფება.

PTI-ის ლიდერები პარასკევს განიხილავდნენ, კვირას დაეწყოთ მარში და მთავრობის „გამოსაფიტად“ ნელა დაძრულიყვნენ ისლამაბადისკენ, თუ მსვლელობა მომდევნო კვირამდე გადაედოთ.

ანალიტიკოსების თქმით, პროტესტი სამხედროების მხარდაჭერილი მთავრობისთვის დიდ გამოწვევად შეიძლება იქცეს. მთავრობა ფართოდ სუსტ, არალეგიტიმურ და არაპოპულარულ ხელისუფლებად მიიჩნევა, ხანი კი პოპულარულ გამაერთიანებელ ფიგურად რჩება. მმართველ კოალიციას პრემიერ-მინისტრი შაჰბაზ შარიფი ხელმძღვანელობს. თუმცა ქვეყნის ფაქტობრივ ლიდერად არმიის უფროსი, ფელდმარშალი ასიმ მუნირი მიიჩნევა.

ამ კვირაში PTI-ის ათობით ლიდერი და მინისტრი დააკავეს ან მათი დაკავების ორდერები გასცეს. ხანის სამი და ორშაბათს დააკავეს. მათ უსაფრთხოებისთვის „სერიოზული საფრთხის“ შექმნას ედავებიან.

დაკავება ემუქრება ხანის მშობლიური პროვინციის, ხაიბერ-პახტუნხვას მთავარ მინისტრს, სოჰაილ აფრიდისაც. რეგიონი PTI-ის დასაყრდენია და მარშს იქიდან ათასობით მხარდამჭერი უნდა შეუერთდეს.

აფრიდიმ განაცხადა, რომ PTI მარშს გამართავს, თუ მთავრობა ხანის პატიმრობის პირობებზე მნიშვნელოვან დათმობებზე არ წავა. მოთხოვნებს შორის მისი საქმეების სამართლიანი განხილვაცაა.

აფრიდიმ თქვა: „მთავრობა პანიკაშია. ამიტომ მოაქციეს ისლამაბადი ალყაში და იტაცებენ ჩვენს მინისტრებს. მაგრამ იმრან ხანი ქვეყნის ყველაზე პოპულარული ლიდერია და ხალხი მის მხარდასაჭერად გამოვა“.

აფრიდიმ აღიარა, რომ უსაფრთხოების ძალების მასშტაბურმა მობილიზებამ შესაძლო ძალადობრივი დაპირისპირების შიში გააჩინა. წინა აქციებზე ხელისუფლება ხანის მხარდამჭერების დედაქალაქში შესვლას ძალის გამოყენებით უშლიდა ხელს.

მთავრობამ ხაიბერ-პახტუნხვაში უკვე ათიათასობით უსაფრთხოების თანამშრომელი განათავსა. მან პროვინციის დედაქალაქ ფეშავრისა და ისლამაბადის დამაკავშირებელი მთავარი გზაც ჩაკეტა.

აფრიდიმ დასძინა: „ვიცი, რომ ჩვენს შესაჩერებლად უხეში ძალის გამოყენებისგან თავს არ შეიკავებენ. მაგრამ, თუ უამრავი ადამიანი შეიკრიბება, ცეცხლს ვერ გაგვიხსნიან. იმდენი ხალხის გამოყვანას ვგეგმავთ, რომ ისინი დანებდნენ“.

ხაიბერ-პახტუნხვას გუბერნატორმა ფაისალ ქარიმ კუნდიმ უსაფრთხოების ზომებს „პრევენციული“ უწოდა. ცენტრალური მთავრობის მიერ დანიშნულმა კუნდიმ PTI „არასტაბილურობისა და ძალადობის“ შექმნის მცდელობაში დაადანაშაულა. მან თქვა: „ხელისუფლება ვერცერთ ძალადობრივ ჯგუფს ისლამაბადისკენ მარშის უფლებას ვერ მისცემს“.