ფინეთი საფრანგეთის ბირთვული შეკავების ინიციატივას შეუერთდა

ფინეთი საფრანგეთის გეგმას შეუერთდა, რომელიც ბირთვული შეკავების საკითხზე ევროპის სხვა ქვეყნებთან უფრო მჭიდრო თანამშრომლობას ითვალისწინებს. ამის შესახებ ორმა ქვეყანამ ორშაბათს განაცხადა.

ფინეთის პრეზიდენტმა ალექსანდერ სტუბმა X-ზე დაწერა: „დღეს ახალი ნაბიჯი გადავდგით, რადგან ფინეთი საფრანგეთის ბირთვული შეკავების მოწინავე ინიციატივას შეუერთდა. ინიციატივის უპირველესი მიზანი ევროპის უსაფრთხოების გაძლიერებაა. ის საკუთარი თავდაცვისთვის ევროპის პასუხისმგებლობას ზრდის და ესკალაციის თავიდან აცილებას უწყობს ხელს“.

ფინეთის გადაწყვეტილება კიდევ ერთი მაგალითია, თუ როგორ ცვლიან ევროპელები თავდაცვის მიდგომებს. ამის მიზეზი კონტინენტის მასშტაბით რუსეთის მზარდი ჰიბრიდული თავდასხმები და აშშ-ის უსაფრთხოების გარანტიების საიმედოობასთან დაკავშირებული ეჭვებია. ფინეთი ათწლეულების განმავლობაში ნეიტრალიტეტს ინარჩუნებდა, შემდეგ კი 2023 წელს ნატოს შეუერთდა. ევროპული თავდაცვითი თანამშრომლობის გაღრმავების მხარდაჭერა აჩვენებს, როგორ შეცვალა უკრაინის წინააღმდეგ რუსეთის ომმა ევროპის უსაფრთხოების არქიტექტურა.

საფრანგეთის პრეზიდენტმა ემანუელ მაკრონმა 2 მარტს განაცხადა, რომ გერმანია, პოლონეთი, საბერძნეთი, ნიდერლანდები, ბელგია, დანია და შვედეთი პარიზთან ბირთვული თანამშრომლობის გაღრმავებას დათანხმდნენ. ეს შეიძლება მოიცავდეს ერთობლივ ბირთვულ წვრთნებს, ინფორმაციის გაზიარებას და საბოლოოდ, საფრანგეთის ბირთვული იარაღის ტარების უნარის მქონე Rafale-ის მოიერიშეების მოკავშირე ქვეყნებში დროებით განთავსებას. მაკრონმა ამ კონცეფციას „მოწინავე ბირთვული შეკავება“ უწოდა. ინიციატივას მას შემდეგ ნორვეგიაც შეუერთდა.

სტუბმა თქვა: „საფრანგეთის ინიციატივა ნატოს ბირთვულ შეკავებას არც ცვლის და არც ემთხვევა. ფინეთის მთავარი პრიორიტეტი ნატოსა და ევროკავშირის შემადგენლობაში მოქმედებაა. ფინეთი მშვიდობიან პერიოდში საკუთარ ტერიტორიაზე ბირთვული იარაღის განთავსებას არ აპირებს“.

ორი ქვეყანა უახლოეს თვეებში ბირთვულ საკოორდინაციო ჯგუფს შექმნის, რომელიც ინიციატივის განხორციელებას განიხილავს.