როიტერსი: AfD და კრემლის წარმომადგენელი რუსული გაზის აღდგენას განიხილავენ

როიტერსის ცნობით, ულტრამემარჯვენე პარტია „ალტერნატივა გერმანიისთვის“ (AfD) რუსული გაზის მიწოდების აღდგენის შესახებ მოლაპარაკებებისთვის მზადებას შეუდგა. სააგენტო ორ წყაროს ეყრდნობა.

შეხვედრა შესაძლოა უკვე 2027 წლის მარტში გაიმართოს. მას AfD-ის თანათავმჯდომარეები ალის ვაიდელი და ტინო ხრუპალა დაესწრებიან. შეხვედრაში რუსეთის პირდაპირი ინვესტიციების ფონდის ხელმძღვანელი კირილ დმიტრიევიც მიიღებს მონაწილეობას. თუმცა, სააგენტოს ცნობით, მოლაპარაკებები მხოლოდ იმ შემთხვევაში გაიმართება, თუ რუსეთი და უკრაინა იმ დროისთვის სამშვიდობო შეთანხმების პირობებზე შეთანხმდებიან.

როიტერსს აშშ-ის მაღალჩინოსანმა განუცხადა, რომ სტივ უიტკოფისა და ჯარედ კუშნერის ჩართვაც იგეგმება, თუმცა ჯერჯერობით არცერთი მათგანი მიუწვევიათ. მონაწილეები გაზსადენ „ჩრდილოეთის ნაკადის“ მუშაობის აღდგენას განიხილავენ.

როიტერსის ცნობით, „ჩრდილოეთის ნაკადის“ აღდგენის ნებისმიერ მცდელობას გერმანიაში წინააღმდეგობა შეხვდება. მწვანეთა პარტიის დეპუტატი მიხაელ კელნერი რუსეთის უკრაინაში შეჭრის შემდეგ პირველ წლებში გერმანიის ენერგეტიკულ პოლიტიკას ხელმძღვანელობდა. კელნერმა განაცხადა, რომ კრიზისი 50 მილიარდი ევრო დაჯდა და რუსული გაზის მიწოდებაზე დაბრუნება „ღალატი“ იქნება. ბუნდესტაგის წევრმა, ქრისტიან-დემოკრატიული კავშირის წარმომადგენელმა როდერიხ კიზევეტერმა მიწოდების შესაძლო აღდგენას კატასტროფა უწოდა.

კიზევეტერმა თქვა: „რუსეთი ენერგიას, განსაკუთრებით კი „ჩრდილოეთის ნაკადს“, სამხედრო მიზნებისთვის ჰიბრიდულ იარაღად იყენებს. „ჩრდილოეთის ნაკადის“ ხელახლა გახსნა ევროპის უსაფრთხოებისთვის კატასტროფა იქნება და გერმანიას იზოლაციაში მოაქცევს“.

როიტერსის ცნობით, შეხვედრას სიმბოლური მნიშვნელობა ექნება, რადგან AfD გერმანიის ფედერალურ მთავრობაში არ შედის. მიუხედავად ამისა, პარტია იმედოვნებს, რომ მოლაპარაკებები ამომრჩევლებს მის საგარეოპოლიტიკურ კომპეტენტურობას დაანახებს. AfD-ს ასევე სურს აჩვენოს, რომ მთავრობა ენერგიის მაღალ ფასებს ვერ უმკლავდება.