პოლონეთში Starlink-ის სადგურის დაწვის სავარაუდო დამკვეთი დააკავეს

პოლონეთში Starlink-ის სატელიტური ქსელის მიწისზედა სადგურის დაწვის სავარაუდო დამკვეთი წინასწარ პატიმრობაშია. ბადენ-ვიურტემბერგის მიწის კრიმინალური პოლიციის სამმართველოსა და შტუტგარტის გენერალურმა პროკურატურამ განაცხადეს, რომ პოლიციის სპეცდანიშნულების რაზმებმა თურქეთის მოქალაქე როიტლინგენის რაიონში დააკავეს.

ოქტომბრის შუა რიცხვებში პოლონეთის მოთხოვნით ნიურტინგენში თურქეთის კიდევ ორი მოქალაქე დააკავეს. მათ წინააღმდეგ ამჟამად ექსტრადიციის პროცედურა მიმდინარეობს. Starlink-ის სატელიტური ქსელი უკრაინის თავდაცვისთვის სტრატეგიულად მნიშვნელოვანი ნაწილია რუსეთის აგრესიის წინააღმდეგ ომში.

ბადენ-ვიურტემბერგის მიწის კრიმინალური პოლიციის სამმართველოს ცნობით, დაკავებულს ტერორისტული დანაშაულის მომზადებას ედავებიან. გამოძიების ამჟამინდელი მონაცემებით, მან გერმანიიდან ორ მამაკაცს პოლონეთში ცეცხლის წაკიდება დაუკვეთა. გენერალური პროკურატურის ცნობით, მის წინააღმდეგ ცალკე ეროვნული გამოძიება დაიწყო.

უწყების ცნობით, სავარაუდო დივერსანტები 2026 წლის 23 სექტემბრის ღამეს პოლონეთში ჩაიყვანეს, რათა Starlink-ის ტერმინალისთვის ცეცხლი წაეკიდებინათ. როიტლინგენის რაიონში დაკავებულ მამაკაცს რვა მობილური ტელეფონი და საბრძოლო მასალა ჩამოართვეს. ვარშავის ხელისუფლება ადრე ვარაუდობდა, რომ ხანძრის უკან რუსეთის სპეცსამსახურები იდგნენ.

ჟურნალ „შპიგელის“ ინფორმაციით, გამომძიებლების ერთ-ერთი კვალი „დალტონებისკენ“, თურქული ორგანიზებული დანაშაულებრივი ჯგუფისკენ მიდის, რომელიც გერმანიაშიც მოქმედებს. ეს რამდენიმე ქვეყნიდან დამოუკიდებელმა წყაროებმა დაადასტურეს. მათი ცნობით, დაჯგუფების წევრებს შესაძლოა მიზანმიმართული დივერსია რუსეთის სპეცსამსახურების დავალებით ჩაედინათ.

სექტემბრის ბოლოს ვარშავის სამხრეთით, ვოლდა კრობოვსკაში, Starlink-ის ტერმინალში ხანძარი გაჩნდა. ეს ტერმინალი უკრაინაში ინტერნეტის მუშაობის უსაფრთხოებისთვისაც მნიშვნელოვანია. ოქტომბრის შუა რიცხვებში ლიტვასა და ბულგარეთშიც სცადეს კომპანიის ტერიტორიაზე Starlink-ის მოწყობილობებისთვის ცეცხლის წაკიდება აალებადი სითხეებითა და მოლოტოვის კოქტეილებით. ეს თავდასხმები დაკავების ორდერში არ შედის. ოქტომბრის შუა რიცხვებში სოფიასთან მომხდარი ხანძრის შემდეგ დუისბურგში გერმანიის ორი მოქალაქე დააკავეს და ისინი ექსტრადიციის მოლოდინში პატიმრობაში იმყოფებიან.