რუსეთი კიევს კვლავ რაკეტებითა და დრონებით დაესხა თავს

სოლომიანსკის რაიონში საცხოვრებელი კორპუსის ეზოში რაკეტის „ნამსხვრევები“ ჩამოცვივდა. დარტყმა საგანმანათლებლო დაწესებულების ერთ-ერთ შენობას მოხვდა, სადაც ხანძარი გაჩნდა. კლიჩკოს თქმით, დარტყმა ინფრასტრუქტურული ობიექტის ადმინისტრაციულ შენობასაც მოხვდა. მას საგანმანათლებლო დაწესებულება და ინფრასტრუქტურული ობიექტი არ დაუსახელებია.

პეჩერსკის რაიონში თავდასხმის შემდეგ სამსართულიან არასაცხოვრებელ შენობას ხანძარი გაუჩნდა. ჰოლოსიივსკის რაიონში „ნამსხვრევების ჩამოცვენის“ შედეგად საცხოვრებელი კორპუსის სახურავი დაიწვა.

უკრაინის საგანგებო სიტუაციების სახელმწიფო სამსახურის ცნობით, ჰოლოსიივსკის რაიონში ერთი ადამიანი დაშავდა. მაშველებმა დაზიანებული შენობიდან 10 ადამიანის ევაკუაცია მოახდინეს.

კიევის ოლქის ბუჩის რაიონში რუსული დრონის დარტყმის შედეგად კერძო სახლსა და მეზობელი შენობის სახურავს ხანძარი გაუჩნდა. ორი ადამიანი საავადმყოფოებში გადაიყვანეს.

რუსეთის ძალები რამდენიმე დღეა, კიევს დღისითაც და ღამითაც ურტყამენ. 28 სექტემბერს დარტყმები უკრაინის მეცნიერებათა ეროვნული აკადემიის კუთვნილ შენობასაც შეეხო, სადაც ხანძარი გაჩნდა. კიევის ხელისუფლების ცნობით, ორშაბათის თავდასხმების შედეგად ორი ადამიანი დაიღუპა და 26 დაშავდა. დაშავებულთაგან რვა ადამიანი კვლავ საავადმყოფოში რჩება.