რუსეთის „არამეგობრული ქვეყნების“ სია ქონებას, ბავშვებზე მეურვეობასა და ვალებსაც ეხება

რუსეთის მიერ „არამეგობრულად“ მიჩნეული ქვეყნების სიამ საგარეო ეკონომიკური პოლიტიკის ფარგლებს გასცდა და შიდა სასამართლოებს, საოჯახო სამართალს, საკუთრების უფლებებსა და ფინანსურ ვალდებულებებსაც შეეხო. რიგი განკარგულებებითა და სასამართლო გადაწყვეტილებებით მისი მოქმედება ფიზიკურ პირებზეც გავრცელდა.

მოსკოვის მიერ არამეგობრულად მიჩნეული სახელმწიფოების სია შურისძიების ზომად 2022 წლის მარტში, რუსეთის მიერ უკრაინაში სრულმასშტაბიანი შეჭრიდან რამდენიმე კვირაში, მთავრობის განკარგულებით დამტკიცდა.

სიაში შედის აშშ, გაერთიანებული სამეფო, კანადა, იაპონია, სამხრეთ კორეა, შვეიცარია, უკრაინა, ავსტრალია, ახალი ზელანდია და ევროკავშირის წევრი ქვეყნები. ყველა მათგანი რუსეთის აგრესიულ ომს ეწინააღმდეგება.

ამ შემოდგომაზე რუსეთის მთავრობამ არამეგობრული ქვეყნებიდან იმპორტირებულ სპირტიან სასმელებზე საბაჟო გადასახადი თითქმის გააორმაგა და 20%-დან 35%-მდე გაზარდა. ეს ზომა ძირითადად ევროპელ და ჩრდილოამერიკელ მწარმოებლებს შეეხო.

კრემლის პრესსპიკერმა დმიტრი პესკოვმა განაცხადა, რომ უცხოური კომპანიების რუსეთში არსებული აქტივების დროებით მმართველობაში გადაცემის ზომა პირდაპირ უკავშირდებოდა იმას, რომ ამ კომპანიების წარმოშობის ქვეყნები სიაში იყო შეტანილი.

ზომა შეეხო ნესტლეს (Nestlé), ოშანის (Auchan), ეფემ ლოჯისტიკის (FM Logistic), ლეროი მერლენის (Leroy Merlin), მეტრო კეშ ენდ ქერის (Metro Cash & Carry), ტარკეტის (Tarkett), იაპონ ტობაკო ინტერნეშენალის (Japan Tobacco International, JTI) და სხვა კომპანიების რუსულ საქმიანობას.

რუსეთის უზენაესმა სასამართლომ ბავშვზე მეურვეობის დავაში არამეგობრული ქვეყნების სტატუსი მოიშველია. სასამართლოს გადაწყვეტილებით, ბავშვის საფრანგეთში დაბრუნება შესაძლოა მის ინტერესებს ეწინააღმდეგებოდეს, ნაწილობრივ იმიტომ, რომ საფრანგეთი ამ სიაშია.

2025 წლის მარტში რუსეთის მოქალაქემ, ალექსეი ერმაკოვმა, ქალიშვილთან ერთად ორკვირიანი დასვენება თურქეთსა და სლოვაკეთში მოაწყო, ბავშვის დედის, უკრაინის მოქალაქე ანა ტიშკოვას თანხმობით. შემდეგ, აპრილში, ბავშვი რუსეთში წაიყვანა.

ერმაკოვმა მოგვიანებით გოგონას რუსეთის მოქალაქეობა გაუფორმა. მიუხედავად საერთაშორისო შეთანხმებებისა, რომლებიც ბავშვების ჩვეულ საცხოვრებელ ქვეყანაში დაბრუნებას ითვალისწინებს, სასამართლომ საფრანგეთში მისი დაბრუნების მოთხოვნა არ დააკმაყოფილა.

სახელმწიფო დუმაში მხარდაჭერილი კანონპროექტი რუსეთში იმ ავტომობილების რეგისტრაციის შესაძლებლობას შექმნიდა, რომლებიც არამეგობრულ ქვეყნებში მოიპარეს ან უკანონოდ გაიტანეს.