რუსეთის დარტყმების შედეგად კიევსა და ოდესაში 13 ადამიანი დაშავდა

კიევის საქალაქო სამხედრო ადმინისტრაციამ (Kyiv City Military Administration) Telegram-ზე დაწერა: „სარაკეტო დარტყმების საფრთხის გამო კიევში საჰაერო განგაში გამოცხადდა. მოსახლეობას მოვუწოდებთ, უახლოეს თავშესაფრებს შეაფაროს თავი“.

ოფიციალურმა პირებმა შეტყობინებების პროგრამაში განაცხადეს, რომ უკრაინის დედაქალაქში სულ მცირე 10 ადამიანი დაშავდა. კიევის მერმა ვიტალი კლიჩკომ თქვა, რომ ბოლო დარტყმებმა საცხოვრებელი კორპუსები და საწყობები დააზიანა. მისივე თქმით, ნამსხვრევები ბენზინგასამართ სადგურთანაც ჩამოცვივდა.

როიტერსმა და AFP-მ თვითმხილველებზე დაყრდნობით გაავრცელეს ინფორმაცია, რომ კიევში „ძლიერი“ აფეთქებების ხმა ისმოდა.

შავი ზღვის საპორტო ქალაქ ოდესაში სულ მცირე სამი ადამიანი დაშავდა, როცა რუსეთის დარტყმა 19-სართულიან საცხოვრებელ კორპუსს მოხვდა. ხელისუფლების ცნობით, დაშავებულებს შორის ბავშვიცაა.

ბოლო თვეებში რუსეთმა და უკრაინამ შორი მოქმედების რაკეტების გამოყენება გაზარდეს. ისინი მოწინააღმდეგის ტერიტორიაზე დარტყმებისთვის დრონების გამოყენებასაც განაგრძობენ.

დარტყმები გრძელდება, მიუხედავად იმისა, რომ რუსეთმა და უკრაინამ ცოტა ხნის წინ აშშ-ის შუამავლობით მოლაპარაკებების განახლებისთვის მზადყოფნა გამოხატეს. უკრაინის პრეზიდენტ ვოლოდიმირ ზელენსკის ოფისმა მიმდინარე კვირის დასაწყისში განაცხადა, რომ ოფიციალური პირები ოქტომბრის მოლაპარაკებებისთვის ემზადებოდნენ. მსგავსი სიგნალები მოსკოვიდანაც წამოვიდა. მოსკოვმა ასეთი შესაძლებლობა არ გამორიცხა.

სამმხრივი მოლაპარაკებების ბოლო რაუნდი 2026 წლის იანვარსა და თებერვალში აბუ-დაბისა და ჟენევაში გაიმართა, თუმცა გარღვევა ვერ მოიტანა. აღმოსავლეთ უკრაინაში ტერიტორიების კონტროლის საკითხი გადაუჭრელი დარჩა.