რუსეთის საზღვართან პოლონეთის სოფელში ახალ ჰიბრიდულ თავდასხმას შიშობენ

ვუიჩიცკი ასობით ბავშვის უსაფრთხოებაზეა პასუხისმგებელი. ისინი დოროჰუსკის სკოლაში ახლომდებარე სოფლებიდან დადიან. როდესაც დირექტორი ამ ამოცანის მასშტაბზე საუბრობდა, ხმა აუკანკალდა.

პოლონეთის თავდაცვის მინისტრი ვლადისლავ კოსინიაკ-კამიში 22 სექტემბერს დოროჰუსკი-იაჰოდინის სასაზღვრო გამშვებ პუნქტს ეწვია. მან გამოაცხადა, რომ სასაზღვრო რეგიონში საჰაერო თავდაცვის ახალ საშუალებებს განათავსებდნენ. მინისტრმა დასძინა, რომ Patriot-ის ბატარეები უკრაინის მოსაზღვრე ორ პოლონურ რეგიონში განალაგეს, მათ შორის იმ რეგიონში, სადაც დოროჰუსკი მდებარეობს.

მთავრობის გაფრთხილებები მკაცრია, თუმცა სამოქალაქო თავდაცვისთვის მზადების მხრივ უკრაინასთან ყველაზე ახლოს მდებარე დასახლებებიც ჯერ კიდევ ჩამორჩებიან.

დოროჰუსკიდან დასავლეთით 90 კილომეტრში მდებარე ქალაქ ლუბლინში მცხოვრებთა უსაფრთხოების ხელმძღვანელმა მიროსლავ სოკალმა თქვა: „სამოქალაქო მედეგობისა და საფრთხეების მიმართ სახელმწიფოს მედეგობის ჩამოყალიბების პროცესის დასაწყისში ვართ. უნდა გვახსოვდეს, რომ გასული 40 წლის განმავლობაში გვეგონა, მშვიდობიან გარემოში ვიცხოვრებდით“.

სოკალის თქმით, უფრო მყარი ინფრასტრუქტურის არარსებობის პირობებში პოლონელებმა საჰაერო საფრთხის დროს ერთი მინიმალური წესი უნდა დაიცვან: შენობაში შევიდნენ და მათსა და ნებისმიერ ფანჯარას შორის ორი კედელი მოაქციონ.

დოროჰუსკის მერმა სავამ განმარტა, რომ სოფლის მცხოვრებლები, როგორც წესი, სარდაფიან კერძო სახლებში ცხოვრობენ. საჰაერო საფრთხის დროს თავის დასამალად სარდაფი ყველაზე აშკარა ადგილია. მან თქვა: „თუ თავად სარდაფი არ მაქვს, სავარაუდოდ, ჩემს მეზობელს ექნება“.

თუმცა დოროჰუსკის ქუჩებში ხალხი ვერ გარკვეულა, რეალური თავდასხმის შემთხვევაში რა შესაძლებლობები აქვს.

80 წელს გადაცილებულმა ირენა პოპეკმა თქვა: „ჯერჯერობით ღამით კარგად მძინავს, ამიტომ ამას მაინცდამაინც ვერ ვიგებ“. მისი თქმით, თვითმფრინავების გამოჩენის შემთხვევაში სარდაფს ვერ გამოიყენებდა, რადგან ის დატბორილია. პოპეკმა დასძინა: „დასამალი უბრალოდ არსად მაქვს და მორჩა“.

ადგილობრივი მაღაზიის თანამშრომელმა რენატა პასტუშომ თქვა, რომ ბოლოდროინდელი განგაშის სირენის დროს მუშაობა გააგრძელა. მისი აზრით, რუსეთის საფრთხის წინაშე დადებითი განწყობის შენარჩუნება სჯობს.

კიდევ ერთმა მცხოვრებმა, კშიშტოფ რულკამ, დაიჩივლა, რომ გაფრთხილებები ახლა მეტისმეტად ხშირად მოდის, რის გამოც ხალხი მათ მნიშვნელობაში ვერ ერკვევა.

რულკამ თქვა: „ვინმეს რომ ეთქვა, დოროჰუსკის ცენტრში დრონი აფეთქდებაო, მეცოდინებოდა, რა უნდა გამეკეთებინა. მაგრამ ასეთი გაურკვევლობის დროს, როცა უკრაინაში სადღაც საჰაერო თავდასხმაა, ახლა მე რა უნდა გავაკეთო? გერმანიაში გავიქცე?“

თემებივოიცეხ სავადონალდ ტუსკიიაროსლავ ვუიჩიცკივლადისლავ კოსინიაკ-კამიშიმიროსლავ სოკალიირენა პოპეკირენატა პასტუშოკშიშტოფ რულკადოროჰუსკიპოლონეთი

გამოქვეყნდა 28 სექტემბერი, 2026