რუსეთის თავდასხმებს უკრაინაში კვლავ მშვიდობიანი მოქალაქეები ემსხვერპლნენ

რუსეთი ღამით უკრაინას კვლავ თავს დაესხა. ქვეყნის მასშტაბით რამდენიმე ადამიანი დაიღუპა, ათეულობით კი დაშავდა. პოლონეთმა რუსული სამხედრო ვერტმფრენის მიერ მისი საჰაერო სივრცის მორიგი დარღვევაც დააფიქსირა.

უკრაინის დედაქალაქ კიევზე რუსეთის დრონების თავდასხმებს სულ მცირე ორი ადამიანი ემსხვერპლა, კიდევ 22 ადამიანი კი დაშავდა. კიევის მერის, ვიტალი კლიჩკოს თქმით, დრონები ცხრასართულიან კომერციულ შენობას, ბიზნესცენტრსა და საწყობებს მოხვდა. ასევე დაზიანდა ორი ბენზინგასამართი სადგური.

მისივე ცნობით, დარტყმები სარკინიგზო ინფრასტრუქტურასაც შეეხო. ერთი თანამშრომელი დაშავდა. უკრაინაში ევროკავშირის ელჩმა, კატარინა მატერნოვამ სოციალურ მედიაში დაწერა, რომ ევროკავშირის წარმომადგენლობასთან ახლოს მდებარე შენობებს ცეცხლი გაუჩნდა.

რუსეთი უკრაინის ჩრდილო-აღმოსავლეთში მდებარე სუმისაც კვლავ თავს დაესხა. სამხედრო გუბერნატორმა ოლეჰ ჰრიჰოროვმა განაცხადა, რომ ქალაქის ოთხ ადგილზე დარტყმები განხორციელდა. მისი თქმით, დარტყმები საცხოვრებელ უბანსა და სამოქალაქო ინფრასტრუქტურას შეეხო. ერთი ადამიანი დაშავდა.

ხარკივის მერის, იჰორ ტერეხოვის ცნობით, სამშაბათ საღამოს განხორციელებულ თავდასხმებს აღმოსავლეთ უკრაინის ქალაქში ერთი ადამიანი ემსხვერპლა, სხვები კი დაშავდნენ. ხელისუფლების ცნობით, ხარკივის ოლქის ქალაქ იზიუმზე თავდასხმებისას რვა ადამიანი დაშავდა. დაბომბვის შედეგად ქალაქის რამდენიმე უბანს ელექტროენერგია შეუწყდა. სამხედრო გუბერნატორის, მიხაილო სემიკინის თქმით, სამხრეთ-აღმოსავლეთ უკრაინის ზაპოროჟიეს ოლქის დასახლება კუშუჰუმში ერთი ადამიანი დაიღუპა. ზაპოროჟიეში სავაჭრო ცენტრზე დარტყმისას კიდევ ორი ადამიანი დაშავდა.

ოდესის ოლქის გუბერნატორმა ოლეჰ კიპერმა განაცხადა, რომ რუსეთი შავი ზღვის რეგიონში ანტიგუა და ბარბუდის დროშით მცურავ სავაჭრო გემს თავს დაესხა. მისი თქმით, გემის უკრაინელი კაპიტანი დაიღუპა. დანარჩენი ეკიპაჟი ევაკუირებულ იქნა, ხანძარი კი ჩააქრეს. მედიკამენტების, საყოფაცხოვრებო საქონლისა და საკვების საწყობებს ზედიზედ ორჯერ დაესხნენ თავს.

მოსკოვის თავდაცვის სამინისტრომ განაცხადა, რომ კიევსა და მის შემოგარენში დრონების დასამზადებელი ნაწილების საწყობსა და თავდაცვით საწარმოს შეუტია. სამინისტროს ცნობით, მოსკოვმა ოდესაში უკრაინის შეიარაღებული ძალებისთვის განკუთვნილი სამხედრო და ორმაგი დანიშნულების საქონლის სამი ლოჯისტიკური ცენტრი დაბომბა. რეგიონში დრონის ნაწილების საწყობიც სამიზნე გახდა.

სამინისტრომ გემზე თავდასხმაც დაადასტურა. უწყების განმარტებით, გემს ოდესაში სამხედრო საქონელი გადაჰქონდა. ამ ცნობების დამოუკიდებლად გადამოწმება შეუძლებელია.