მელანშონი საფრანგეთის ნატოდან გასვლას მოითხოვს

მომავალი წლის აპრილში საფრანგეთის საპრეზიდენტო არჩევნებზე მას წარმატების კარგი შანსი აქვს: მემარცხენე კანდიდატ ჟან-ლუკ მელანშონს. მან ახლა თავისი პროგრამა წარადგინა და ნატოს გარდა, სხვა საკითხებზეც ისაუბრა.

ფრანგმა მემარცხენე პოლიტიკოსმა ჟან-ლუკ მელანშონმა მომავალი წლის საპრეზიდენტო არჩევნების პროგრამის წარდგენისას მოითხოვა, რომ მისი ქვეყანა ნატოდან გავიდეს. „ნატოში და ამერიკის ომებში ჩვენი ადგილი არ არის“, განაცხადა 75 წლის მელანშონმა ანტიკაპიტალისტური პარტია „დაუმორჩილებელი საფრანგეთის“ (La France Insoumise, LFI) პარიზის გარეუბან ლე ბურჟეში გამართულ მიტინგზე. მისი თქმით, საფრანგეთმა ამის ნაცვლად „მიუმხრობლობის პოლიტიკის მიმდევარი ქვეყნების გლობალური ფრონტი“ უნდა შექმნას.

პროგრამაში ასევე გაკრიტიკებულია გერმანიის გავლენა ევროკავშირის ეკონომიკურ პოლიტიკაზე. დოკუმენტის თანახმად, ბერლინი ევროპის მთავარი დამცველია „ორდოლიბერალიზმისა“, ეკონომიკური ფილოსოფიისა, რომელიც მკაცრ საბიუჯეტო წესებს, ფასების სტაბილურობასა და დამოუკიდებელ მონეტარულ პოლიტიკას ეყრდნობა.

მელანშონი მემარცხენე ბანაკის ყველაზე ძლიერ კანდიდატად მიიჩნევა. ბოლო გამოკითხვების თანახმად, მომავალი წლის აპრილის არჩევნებში ის, სავარაუდოდ, მეორე ტურში გავა და ულტრამემარჯვენე პოლიტიკოს მარინ ლე პენს დაუპირისპირდება, თუმცა მეორე ტურში დამარცხდება. პრეზიდენტ ემანუელ მაკრონს არჩევნებში ხელახლა მონაწილეობის უფლება არ აქვს. გამოკითხვები ასევე აჩვენებს, რომ ბევრი მოქალაქე მისი პოლიტიკით უკმაყოფილოა.

მელანშონის საარჩევნო პროგრამა ნატოს მიმართ მის მრავალწლიან კრიტიკას კიდევ ერთხელ ადასტურებს. პროგრამის თანახმად, საფრანგეთის გასვლა ეტაპობრივად უნდა განხორციელდეს და ინტეგრირებული სამხედრო სარდლობის დატოვებით დაიწყოს.

ეკონომიკურ პოლიტიკაში მელანშონმა ეკონომიკის სტიმულირების პროგრამა და მაკრონის პოლიტიკის შეცვლა დააანონსა. „ჩვენ ზუსტად საპირისპიროს გავაკეთებთ, ანუ ეკონომიკის გამოცოცხლების პოლიტიკას გავატარებთ“, განაცხადა მელანშონმა. „პირველ რიგში, სამომხმარებლო ხარჯების გაზრდით, რადგან ჩვენს ქვეყანაში ისინი ეკონომიკის ნახევარზე მეტს შეადგენს. მეორე მხრივ, გამოვიყენებთ მილიარდებს, რომლებიც უკვე გვაქვს. ეს არის დანაზოგი, რომელიც ჩვენი ქვეყნის ეკოლოგიურ და სოციალურ საჭიროებებს უნდა მოხმარდეს“.

მელანშონმა ცხოვრების მაღალი ღირებულების შესამცირებლად დაუყოვნებელი ზომების მიღება მოითხოვა: „ფასების გაყინვა, მინიმალური ხელფასის გაზრდა და ხელფასების ინფლაციასთან მიბმა“.

მისი გეგმით, მინიმალური წმინდა თვიური ხელფასი დაახლოებით 15%-ით, 1 480 ევროდან 1 700 ევრომდე უნდა გაიზარდოს. ასევე უნდა გაიზარდოს გადასახადები ყველაზე შეძლებული ოჯახებისთვის და დაწესდეს ძირითადი საკვები პროდუქტების ფასების ზედა ზღვარი.