რუსეთში უკრაინის ომის ფონზე საპარლამენტო არჩევნები დაიწყო

არჩევნები ვლადიმერ პუტინის რეიტინგის მკვეთრი ვარდნის, ფრონტზე მზარდი დანაკარგებისა და გამოფიტვის ომში მინიმალური ტერიტორიული წინსვლის ფონზე იმართება.

ქვეყნის საარჩევნო სისტემა მკაცრად კონტროლდება. მოსალოდნელია, რომ პუტინის პარტია „ერთიანი რუსეთი“ 450-წევრიან სახელმწიფო დუმაში უმრავლესობას შეინარჩუნებს. პარტიას ამჟამად 310 მანდატი აქვს. კვალიფიციური უმრავლესობის შესანარჩუნებლად მან სულ მცირე 300 მანდატი უნდა მოიპოვოს.

სახელმწიფო სოციოლოგიური სამსახურის, VTsIOM-ის მონაცემებით, არჩევნებამდე გამოქვეყნებულ გამოკითხვაში „ერთიან რუსეთს“ 37% უჭერს მხარს. უახლოეს მეტოქეს, კომუნისტურ პარტიას, 11,6%-იანი მხარდაჭერა აქვს. არჩევნები 18-დან 20 სექტემბრამდე ჩატარდება.

სხვა ოპოზიციური პარტიებია ულტრანაციონალისტური რუსეთის ლიბერალურ-დემოკრატიული პარტია და უკრაინის ომის მოწინააღმდეგე ლიბერალური პარტია „იაბლოკო“. უზენაესმა სასამართლომ „იაბლოკოს“ პარტიული სიით კენჭისყრაში მონაწილეობა აუკრძალა.

თუმცა, პუტინი სისუსტის სულ უფრო მეტ ნიშანს ავლენს. მან აღიარა, რომ ენერგეტიკულ ობიექტებზე უკრაინის თავდასხმები უპრეცედენტო იყო და მოსალოდნელზე მეტი გავლენა მოახდინა.

ომის შემსწავლელმა ინსტიტუტმა (Institute for the Study of War) კვირას გამოქვეყნებულ შეფასებაში დაწერა: „უკრაინულმა ძალებმა 2026 წლის მარტიდან რუსეთის ძალების საერთო წინსვლა თითქმის ნულამდე შეაკავეს“.

ინსტიტუტის ვარაუდით, კრემლი „ცდილობს, აშშ დაარწმუნოს, რომ უკრაინა აიძულოს, დათმოს ტერიტორია, რომლის აღების უნარიც რუსეთის ძალებს ბრძოლის ველზე არ გამოუვლენიათ“. შეფასებაში ამას „კოგნიტური ომის“ მცდელობა ეწოდება.

მთელ ქვეყანაში მხარდაჭერა მცირდება. სახელმწიფო სოციოლოგიური სამსახურის მიერ მიმდინარე წლის მაისში გამოქვეყნებული მონაცემებით, დეკემბრის ბოლოდან აპრილის ბოლომდე პუტინის რეიტინგი 12,2 პროცენტული პუნქტით, 65,6%-მდე დაეცა.

კრემლმა სამშაბათს უფრო შემრიგებლური მიდგომა გამოავლინა. მან დონალდ ტრამპის წინადადებას, რომელიც უკრაინასთან ენერგეტიკულ ობიექტებზე ცეცხლის შეწყვეტას ეხება, „კარგი იდეა“ უწოდა. ეს ირანის მიმდინარე ომის ფონზე, რამდენიმეთვიანი ჩიხური მოლაპარაკებების შემდეგ მოხდა.

ახალი ევრაზიული სტრატეგიების ცენტრის (New Eurasian Strategies Centre) საგარეო პოლიტიკის ხელმძღვანელი და მოსკოვში ნატოს პირველი მუდმივი წარმომადგენელი ჯონ ლაფი ამბობს: „მას სჯერა, რომ იმარჯვებს და წინსვლა უფრო სწრაფი მხოლოდ იმიტომ არ ყოფილა, რომ რუსეთი მარტო უკრაინას კი არა, ნატოს მნიშვნელოვან ნაწილსაც ებრძვის“.

ლაფი დასძენს: „მას ახლა გაჩერების სტიმული არ აქვს, რადგან ეს სისუსტის ნიშანი იქნებოდა. ამასთან, შესაძლებელი გახდებოდა საზოგადოების იმ 10-15%-ის რეაქცია, რომელიც ომს მტკიცედ უჭერს მხარს“.