საფრანგეთი: რუსეთი ევროპელი მოკავშირეების დაშინებასა და დაყოფას ცდილობს

საფრანგეთის საგარეო საქმეთა მინისტრმა ჟან-ნოელ ბარომ ორშაბათს განაცხადა, რომ უკრაინაში ევროპელი ოფიციალური პირების მატარებელთან დრონით თავდასხმის შემდეგ რუსეთი კიევის ევროპელი მოკავშირეების „დაშინებასა“ და „დაყოფას“ ცდილობს.

ბარომ ფინეთში, ევროპის არქტიკული სამიტის ფარგლებში, ჟურნალისტებს განუცხადა: „ამ თავდასხმებს ძალიან მკაფიო მიზანი აქვს: ევროპელები დააშინოს, ხელი ააღებინოს და, უპირველეს ყოვლისა, დაყოს“.

მაუწყებელ BFMTV-ის ცნობით, ბარომ აღნიშნა, რომ იერიშები იმ დროს განხორციელდა, როცა უკრაინა ეკონომიკური მხარდაჭერის დიდ ფორუმს მასპინძლობდა. მას მსოფლიოს სხვადასხვა ქვეყნიდან, განსაკუთრებით ევროპიდან, მრავალი ბიზნესისა და დიპლომატიური წრეების წარმომადგენელი ესწრებოდა.

ბაროს განცხადებას წინ უძღოდა გერმანული გაზეთის, შპიგელის (Der Spiegel), ინფორმაცია. გაზეთის ცნობით, კვირას კიევიდან პოლონეთისკენ მიმავალი კერძოდ დაქირავებული მატარებლიდან მგზავრები ახლომახლო დრონით თავდასხმის შემდეგ გაიყვანეს. მატარებლით ევროპელი ოფიციალური პირები და გაერთიანებული სამეფოს ყოფილი პრემიერ-მინისტრი ბორის ჯონსონი მგზავრობდნენ.

ევროკავშირის საგარეო პოლიტიკის ხელმძღვანელმა კაია კალასმაც განაცხადა, რომ თავდასხმა დასავლეთის ქვეყნების დაშინებასა და კიევის მხარდაჭერაზე ხელის აღებინებას ისახავდა მიზნად.

კალასმა ევროპის არქტიკულ სამიტზე მისვლისას ჟურნალისტებს განუცხადა: „აშკარაა, რომ მიზანი დასავლეთის ქვეყნების დაშინებაა, რათა მათ უკრაინის მხარდაჭერა და მხარდაჭერის გამოსახატავად უკრაინაში ჩასვლა შეწყვიტონ“.

კრემლის პრესმდივანმა დმიტრი პესკოვმა ინციდენტის შესახებ განაცხადა: „თუ სწორად მესმის, საუბარია უკრაინის ტერიტორიაზე. ჩვენი სამხედროები მთელ უკრაინაში ასრულებენ ამოცანებს და ამის გაკეთებას გააგრძელებენ“.