სეული ელჩს იწვევს, კიევი დიალოგისთვის მზადაა

სამხრეთ კორეამ ეს გადაწყვეტილება მას შემდეგ გამოაცხადა, რაც რამდენიმე დღით ადრე პრეზიდენტი ლი ჯე-მიონი სადამსჯელო ზომებით დაიმუქრა. მას ზომები არ დაუკონკრეტებია. პრეზიდენტის თქმით, მათ იმ შემთხვევაში მიიღებენ, თუ უკრაინა ინფორმაციის გამჟღავნების გამო ბოდიშს არ მოიხდის.

სეულში საგარეო საქმეთა სამინისტროს არ უთქვამს, როდის დააბრუნებენ ელჩ პაკ კი-ჩანს ქვეყანაში. თუმცა სამინისტრომ განცხადებაში დაადასტურა, რომ უკრაინასთან კონსულტაციებს გააგრძელებს. უწყებამ იმედი გამოთქვა, რომ ქვეყნებს შორის დავა მშვიდობიანად მოგვარდება.

უკრაინის საგარეო საქმეთა სამინისტროს პრესსპიკერმა ჰეორჰი ტიხიმ განაცხადა, რომ ელჩის გაწვევის გადაწყვეტილების მიუხედავად, კიევი „კონსტრუქციული დიალოგისთვის“ მზადაა.

ტიხიმ უკრაინულ მედიას განუცხადა: „დიპლომატიამ ემოციებზე უნდა გაიმარჯვოს“.

სამხრეთ კორეასა და უკრაინას შორის დიპლომატიური დავა მას შემდეგ დაიწყო, რაც ზელენსკიმ ჩრდილოკორეელი სამხედროების გადაყვანაზე 23 სექტემბერს გაეროში სიტყვით გამოსვლისას ისაუბრა.

სეულმა კიევი სექტემბრის შუა რიცხვებში მათი გადაყვანის შესახებ ინფორმაციის გაუმჟღავნებლობის შეთანხმების დარღვევაში დაადანაშაულა. კიევი უარყოფს, რომ ასეთ შეთანხმებას დათანხმდა.

სამხედროები იმ ათასობით ჩრდილოკორეელ ჯარისკაცს შორის იყვნენ, რომლებიც უკრაინის წინააღმდეგ რუსეთის ომის მხარდასაჭერად გაგზავნეს. 2025 წლის დასაწყისში დატყვევების შემდეგ მათ სამხრეთ კორეაში გადასახლების სურვილი გამოთქვეს, რადგან სამშობლოში დაბრუნების შემთხვევაში შესაძლოა დევნა დაემუქროთ.

სამხრეთ კორეამ განაცხადა, რომ მათ მიიღებდა. ქვეყანა კანონით ჩრდილოეთ კორეას საკუთარ ტერიტორიად მიიჩნევს. მას ასევე ჩრდილოკორეელი დეზერტირების მიღებისა და ფინანსური დახმარების პოლიტიკა აქვს.

სამხრეთ კორეელმა ოფიციალურმა პირებმა განაცხადეს, რომ გაუმჟღავნებლობის შეთანხმება ჩრდილოკორეელი სამხედროებისა და ჩრდილოეთ კორეაში მათი ნათესავების უსაფრთხოებაზე შეშფოთების გამო დაიდო.

თუმცა ბევრი ექსპერტის თქმით, სამხრეთ კორეის ლიბერალური მთავრობა სავარაუდოდ სხვა საკითხზეც ღელავს. მათი შეფასებით, სამხედროების ჩასვლის გამჟღავნებამ შესაძლოა ჩრდილოეთ კორეასთან ურთიერთობის გაუმჯობესების მცდელობები დააზიანოს.

ჩრდილოეთ კორეის სახელმწიფო მედიას სამხედროების გადაყვანაზე კომენტარი არ გაუკეთებია. თუმცა ფხენიანი ადრე საკუთარი მოქალაქეების გახმაურებულ გაქცევებს მძაფრად გამოეხმაურა და სამხრეთ კორეა მათ გატაცებაში დაადანაშაულა.

2019 წლიდან ფხენიანი სეულსა და აშშ-სთან მოლაპარაკებებს თავს არიდებს და ბირთვული პროგრამის გაძლიერებაზეა ორიენტირებული.