სტამბოლში ეკრემ იმამოღლუს 25-თვიანი პატიმრობა მიუსაჯეს

სტამბოლის გადაყენებულ მერს, ეკრემ იმამოღლუს, სადავო სასამართლო პროცესზე 25-თვიანი პატიმრობა მიუსაჯეს. თურქული მედიის ცნობით, სასამართლომ პრეზიდენტ რეჯეფ თაიფ ერდოღანის უკვე პატიმრობაში მყოფი მეტოქე საჯარო მოხელის შეურაცხყოფაში დამნაშავედ ცნო.

მედიის ცნობით, სასამართლომ მას პოლიტიკური საქმიანობაც აუკრძალა. თუ განაჩენი კანონიერ ძალაში შევა, იმამოღლუ თანამდებობას ფორმალურადაც დაკარგავს. სტამბოლის საკრებულო მრავალმილიონიანი ქალაქის ახალი მერის არჩევას შეძლებს.

იმამოღლუ დიდი ხნის პრეზიდენტის, ერდოღანის, ყველაზე გამორჩეული მეტოქეა. შესაძლო საარჩევნო დაპირისპირებისას ის დიდხანს მიიჩნეოდა ერდოღანის სავარაუდო შემცვლელად. თუმცა მის წინააღმდეგ დაწყებული მრავალი გამოძიების, სასამართლო პროცესისა და გამოტანილი განაჩენის ფონზე, გაურკვეველია, კვლავ რამდენად შეუძლია მას ისლამურ-კონსერვატიული პრეზიდენტისთვის საფრთხის შექმნა.

იმამოღლუ ბოლო სასამართლო სხდომას მკაცრი რეჟიმის ციხიდან დისტანციურად ჩაერთო. სახელმწიფო მაუწყებელ TRT-ის ცნობით, მან განაჩენს სკანდალური, ხოლო ბრალდებებს უსაფუძვლო უწოდა. მას ოთხი წლის წინ სტამბოლის ერთ-ერთი რაიონის მერის შეურაცხყოფა ედებოდა ბრალად.

მანამდე სასამართლომ იმამოღლუ ორჯერ გაამართლა. შემდეგ სააპელაციო სასამართლომ საქმე სავარაუდო პროცედურული დარღვევების გამო ხელახლა განსახილველად დააბრუნა. თურქეთის ოპოზიცია პროცესს პოლიტიკურად მოტივირებულად მიიჩნევს. ოპოზიციის თქმით, მისი ერთადერთი მიზანი ერდოღანის მეტოქის ჩამოშორებაა.

2019 წლის ადგილობრივი არჩევნების შემდეგ სტამბოლის მუნიციპალიტეტს ოპოზიციური სახალხო რესპუბლიკური პარტია (CHP) მართავს. 2024 წელს იმამოღლუმ მერის თანამდებობა შეინარჩუნა. 2025 წლის მარტში მთელი ქვეყნის მასშტაბით დაპატიმრებების ტალღა დაიწყო. სამართალდამცავებმა იმამოღლუ, მერიის მრავალი თანამშრომელი და თურქეთის სხვა ქალაქების CHP-ის მერები დააკავეს.

ამას გამოძიებებისა და სასამართლო პროცესების მთელი რიგი მოჰყვა. იმამოღლუს, მათ შორის, კორუფციას, ფულის გათეთრებასა და დანაშაულებრივი გაერთიანების შექმნას ედავებოდნენ.

გერმანიის მთავრობამ, ევროპარლამენტმა და ევროკომისიამ იმამოღლუს გადაყენება თურქეთის დემოკრატიისთვის მძიმე უკუსვლად შეაფასეს. ერდოღანის მთავრობა სასამართლო ხელისუფლებაზე რაიმე გავლენის მოხდენას უარყოფს.