თალიბანი პასპორტებით ევროკავშირის ქვეყნებზე ზეწოლას აძლიერებს

NDR-ის მოკვლევის თანახმად, ავღანეთის მმართველი თალიბანი ევროკავშირის არაერთ ქვეყანაზე ზეწოლას აძლიერებს, რათა იქ საკუთარი დიპლომატების გაგზავნა შეძლოს. ზეწოლის ბერკეტი პასპორტებია.

ბოლო კვირებში ბერლინის რაიონ გრუნევალდში, ავღანეთის საელჩოს წინ, ხალხმრავლობაა. ყოველდღიურად საკონსულო განყოფილების შესასვლელთან ათობით ადამიანი რიგში დგას. მათ პასპორტები, სამემკვიდრეო მოწმობები და დაბადების მოწმობები სჭირდებათ.

ამ საბუთებს ისინი აქ იღებენ, რადგან საელჩოს ფაქტობრივად უკვე თალიბანის წარმომადგენელი ხელმძღვანელობს. მას ქაბულთან პირდაპირი კავშირი აქვს, რაც ასეთი მნიშვნელოვანი დოკუმენტების გასაცემად აუცილებელია. აქამდე სწორედ ამიტომ ჩამოდიოდა ბერლინში ბევრი ავღანელი გერმანიის მეზობელი ქვეყნებიდან, მათ შორის, ბელგიიდან, საფრანგეთიდან, შვეიცარიიდან და ავსტრიიდან.

თუმცა რამდენიმე კვირის წინ ვითარება მოულოდნელად შეიცვალა. ავღანეთიდან მიღებული მითითების გამო, გერმანიის გარეთ მცხოვრებ პირებს საბუთებს აღარ აძლევენ. ყოფილმა დიპლომატმა და რეჟიმის მოწინააღმდეგე ჰამიდ ქაბირიმ განაცხადა: „პრობლემაა, რომ ისინი სხვა ქვეყნებიდან განაცხადებს აღარ იღებენ. ამით მათ ადამიანებზე ზეწოლა სურთ“. ქაბირიმ დასძინა: „გარდა ამისა, ისინი სხვა მთავრობებზეც ზეწოლას ახდენენ, რათა მათ მათი დიპლომატები მიიღონ, როგორც ეს გერმანიამ გააკეთა“.

თითქმის ერთი თვეა, თალიბანი გერმანიაში ავღანეთის ყველა დიპლომატიურ წარმომადგენლობას აკონტროლებს. ბევრი ემიგრაციაში მცხოვრები ავღანელი აღშფოთებულია.

თალიბანის მიზანი ნათელია: გერმანიის მსგავსად, ევროკავშირის სხვა ქვეყნებმაც რადიკალი ისლამისტების საკონსულო თანამშრომლები უნდა მიიღონ. გერმანიის მთავრობა ამას გასული წლიდან აკეთებს. თუმცა ბრიუსელში, პარიზში, ჟენევასა და ვენაში ავღანეთის საელჩოებს კვლავ ის დიპლომატები აკონტროლებენ, რომლებიც თალიბანის ხელისუფლებაში მოსვლამდე, 2021 წლის აგვისტოში გაგზავნეს. ისინი რეჟიმის მოწინააღმდეგეები არიან. თუმცა ამ მისიებს პასპორტებისა და სხვა მნიშვნელოვანი საბუთების გაცემა აღარ შეუძლიათ, რადგან თალიბანმა ისინი პრაქტიკულად იზოლაციაში მოაქცია.

ბელგიაში ავღანეთის ელჩმა და თალიბანის მოწინააღმდეგე ნაზიფულა სალარზაიმ თქვა: „პასპორტები და საკონსულო დოკუმენტები აუცილებელია. ამ მომსახურებაზე წვდომის გაუქმება ან შეზღუდვა კიდევ უფრო გაამწვავებს სირთულეებს, რომლებსაც ევროპაში ავღანელები ისედაც ებრძვიან“.

NDR-ის ცნობით, თალიბანმა ამ კვირაში გერმანიაში დელეგაცია გაგზავნა.

ელჩმა სალარზაიმ თავად არ იცის ქაბულის მითითების შინაარსი, რადგან მის საელჩოს იქაურ საგარეო საქმეთა სამინისტროსთან კავშირი აღარ აქვს. თუმცა სალარზაის თქმით, თალიბანის ასეთი მოქმედება გასაკვირი არ არის.