ტრამპის ადმინისტრაციამ საუდის არაბეთისთვის F-35-ების მიყიდვა დაამტკიცა

სახელმწიფო დეპარტამენტმა ხუთშაბათს განცხადებაში აღნიშნა: „შემოთავაზებული გარიგება აშშ-ის საგარეო პოლიტიკისა და ეროვნული უსაფრთხოების მიზნებს შეუწყობს ხელს. ის გააუმჯობესებს ნატოს არაწევრი მთავარი მოკავშირის უსაფრთხოებას, რომელიც სპარსეთის ყურის რეგიონში პოლიტიკური სტაბილურობისა და ეკონომიკური წინსვლის ხელშემწყობი ძალაა“.

ადმინისტრაციის განცხადებით, აშშ-ის ყველაზე მოწინავე გამანადგურებლების გაყიდვა „რეგიონში სამხედრო ბალანსს არ შეცვლის“. ეს შეესაბამება აშშ-ის ხანგრძლივ პოლიტიკას, რომლის თანახმადაც, ისრაელმა შესაძლო რეგიონულ მოწინააღმდეგეებთან შედარებით სამხედრო უპირატესობა უნდა შეინარჩუნოს.

განცხადებამდე ერთი დღით ადრე, ოთხშაბათს, იემენში ჰუსიებმა განაცხადეს, რომ მარიბის თავზე საუდის არაბეთის F-15 გამანადგურებელი ჩამოაგდეს. მარიბი საუდის არაბეთის მიერ მხარდაჭერილ იემენის სამთავრობო ძალებთან ბრძოლაში საკვანძო ქალაქია. დაჯგუფებამ გაავრცელა ვიდეო, რომელშიც ქალაქში მებრძოლები დამწვარი ნამსხვრევების წინ დგანან. ნამსხვრევები საუდის არაბეთის ნიშნებიანი, აშშ-ში დამზადებული F-15 გამანადგურებლისა ჩანდა.

ჰუსიების მტკიცებით, თვითმფრინავი „ადგილობრივად დამზადებული“ მიწა-ჰაერის ტიპის რაკეტით ჩამოაგდეს. ეს რეგიონში დაჯგუფების საბრძოლო შესაძლებლობების მკვეთრ ცვლილებაზე მიუთითებდა. აქამდე საუდის არაბეთის სამხედრო ძალები იემენის საჰაერო სივრცეში შედარებითი უპირატესობით სარგებლობდნენ. ისინი მეზობელ ქვეყანაში საჰაერო იერიშების განხორციელების შესაძლებლობას დიდწილად ეყრდნობოდნენ.

გავრცელებული ცნობით, საუდის არაბეთსა და ჰუსიებს შორის გამწვავებულ ბრძოლას ხუთშაბათს სულ მცირე ხუთი ადამიანი ემსხვერპლა, მათ შორის სამი ბავშვი.

საუდის არაბეთი ვაშინგტონს ჰუსიების ძალებთან სამეფოს კონფლიქტში უფრო პირდაპირი როლის შესრულებას უშედეგოდ სთხოვდა. აშშ-ის განცხადებით, ირანის მიერ მხარდაჭერილ ჰუსიებს, საუდის არაბეთსა და საუდის არაბეთის მიერ მხარდაჭერილ იემენის მთავრობას შორის კონფლიქტში პირდაპირ არ ჩაერევა.

ვაშინგტონი ასევე შეშფოთებულია, რომ გამანადგურებლებთან დაკავშირებით ჩინეთმა შესაძლოა ჯაშუშობა განახორციელოს.

ნიუ-იორკ ტაიმსმა (The New York Times) ამ კვირაში გაავრცელა ინფორმაცია, რომ აშშ-ის დაზვერვის ანალიტიკოსებმა პეკინის მიერ F-35-ის ტექნოლოგიის მოპოვების შესაძლებლობაზე გააფრთხილეს. მათი შეფასებით, ეს შესაძლოა ერ-რიადთან პარტნიორობის მეშვეობით მოხდეს.

აშშ-ის კონგრესის წარმომადგენელთა პალატის დაზვერვის კომიტეტის დემოკრატმა წევრმა რაჯა კრიშნამურტიმ (Raja Krishnamoorthi) ამ მიზეზით გარიგებას წინააღმდეგობა გამოუცხადა.

კრიშნამურტიმ განცხადებაში თქვა: „გარიგება არ უნდა შედგეს, როცა ჩვენი დაზვერვის საზოგადოება გვაფრთხილებს, რომ ამან ამერიკული სამხედრო ტექნოლოგიის უმნიშვნელოვანესი მიღწევები შესაძლოა ჩინეთის კომუნისტური პარტიისთვის ხელმისაწვდომი გახადოს“.