ისრაელის საარჩევნო კომისია შედეგების ძალაში დატოვებას აპირებს, ნეთანიაჰუ არჩევნებს „მოპარულს“ უწოდებს

ისრაელის საარჩევნო კომისიის ხელმძღვანელმა განაცხადა, რომ ქვეყნის საყოველთაო არჩევნების შედეგები ძალაში დარჩება მაშინაც კი, თუ უცხოური ჩარევის შესახებ ბრალდებები დადასტურდება.

ცენტრალური საარჩევნო კომიტეტის ხელმძღვანელმა ნოამ სოლბერგმა კვირას ვიდეომიმართვაში განაცხადა, რომ ეჭვების დადასტურებაც კი საარჩევნო პროცესისა და მთლიანობაში არჩევნების შედეგების სანდოობას არ შეარყევს. ვიდეოში მასთან ერთად ისრაელის შიდა უსაფრთხოების სააგენტოს, შინ ბეთის, ხელმძღვანელი და გენერალური პროკურორი გამოჩნდნენ.

პრემიერ-მინისტრ ბენიამინ ნეთანიაჰუს პარტია „ლიკუდმა“ შედეგები ეჭვქვეშ დააყენა. პარტიამ მტკიცებულებების წარმოდგენის გარეშე განაცხადა, რომ არაბთა ხელმძღვანელობით მოქმედმა პარტიებმა, რომლებმაც სამშაბათის არჩევნებში მნიშვნელოვანი წარმატება მოიპოვეს, ხმა „მოიპარეს“ და ამისთვის კატარისგან დაფინანსება მიიღეს.

კატარმა ბრალდებები უარყო და მათ დეზინფორმაციული კამპანია უწოდა.

კვირას ისრაელის პოლიციამ სამი პოლიტიკურ აქტივისტიდან ორი გაათავისუფლა. ისინი სამშაბათის არჩევნების დაწყებამდე დააკავეს. პოლიციის ცნობით, აქტივისტებს ნაღდი ფულით სავსე კონვერტები ჰქონდათ, სავარაუდოდ, ამომრჩევლების მოსასყიდად.

ერთ-ერთი დაკავებული გაურკვეველი პირობებით გაათავისუფლეს, მეორეს კი შინაპატიმრობაში დარჩენა დაავალეს.

პოლიციის განცხადებით, ეჭვმიტანილები არაბთა ხელმძღვანელობით მოქმედ პარტია „რაამთან“ იყვნენ დაკავშირებული. პარტიამ რვა ადგილი მოიპოვა.

მისმა ლიდერმა, მანსურ აბასმა, დაკავებები არადემოკრატიულად შეაფასა და განაცხადა, რომ ეს არჩევნების შედეგებზე გავლენის მოხდენის მცდელობა იყო.

მთავარი ოპოზიციური ძალის ლიდერმა აიზენკოტმა კვირას ნეთანიაჰუ დაადანაშაულა, რომ მან შედეგების დელეგიტიმიზაციის ორკესტრირებული და ორგანიზებული კამპანია წამოიწყო.

აიზენკოტს ადრე არაბულ პარტიებთან კოალიციის შექმნა გამორიცხული ჰქონდა, თუმცა სამშაბათის არჩევნებში ჩიხური ვითარების გამო მათთან გაერთიანება მთავრობის ფორმირებაში დაეხმარებოდა.

სამშაბათის არჩევნებში ნეთანიაჰუს ბლოკმა 53 ადგილი მოიპოვა, ხოლო ოპოზიციურმა ბლოკმა, რომელსაც გადი აიზენკოტი ხელმძღვანელობს, 48. ეს ნიშნავს, რომ ისრაელის 120-ადგილიან პარლამენტში ვერც ერთი მხარე დამოუკიდებლად ვერ შექმნის მთავრობას.

ისრაელის სამმა არაბთა ხელმძღვანელობით მოქმედმა პარტიამ, მათ შორის პარტია „რაამმა“, რეკორდული 19 ადგილი მოიპოვა.

არაბული პარტიებისა და აიზენკოტის კოალიციას პარლამენტში კომფორტული უმრავლესობა, 67 ადგილი ექნებოდა. თუმცა ისრაელში ბევრისთვის არაბულ პარტიებთან გაერთიანების იდეა პოლიტიკურად მიუღებელია.