ცხინვალის რეგიონში მარატ კამბოლოვი არჩევნების გამარჯვებულად გამოაცხადეს

საარჩევნო კომისიის მონაცემებით, ბიულეტენების 99%-ის დათვლის შემდეგ კამბოლოვმა ხმების 85,12% მიიღო. აქტივობამ 73,2% შეადგინა, რაც 32 000-ზე მეტ ამომრჩეველს ნიშნავს.

რუსეთის პრეზიდენტმა ვლადიმერ პუტინმა კამბოლოვს გამარჯვება უკვე მიულოცა.

პუტინმა მისალოც დეპეშაში დაწერა: „არჩევნებში ასეთმა დამაჯერებელმა გამარჯვებამ დაადასტურა, რომ ცხინვალის რეგიონის მოქალაქეები დიდ ნდობას გიცხადებენ. მოსკოვსა და ცხინვალს, როგორც მოკავშირეებს, მეგობრული ურთიერთობები აქვთ. დარწმუნებული ვარ, რომ სახელმწიფოს მეთაურად თქვენი საქმიანობა ჩვენი ხალხების საკეთილდღეოდ ამ ურთიერთობების განმტკიცებას შეუწყობს ხელს“.

ვადამდელი არჩევნები მას შემდეგ დაინიშნა, რაც ცხინვალის რეგიონის პრეზიდენტმა ალან გაგლოევმა 23 ივნისს გადადგომა გამოაცხადა. ის პუტინის მრჩეველი გახდა. გადადგომამდე ცოტა ხნით ადრე გაგლოევმა პრემიერ-მინისტრის თანამდებობაზე კამბოლოვი წარადგინა. კამბოლოვი რუსეთის მოქალაქეა, რომელიც რუსეთის მთავრობაში მუშაობდა და კურჩატოვის ინსტიტუტის კვლევით ცენტრში მაღალ თანამდებობებს იკავებდა.

ცხინვალის რეგიონის კანონმდებლობის თანახმად, პრეზიდენტის გადადგომის შემთხვევაში ვადამდელ არჩევნებამდე მის მოვალეობას პრემიერ-მინისტრი ასრულებს. კამბოლოვმა პრემიერ-მინისტრის თანამდებობის დაკავება მაისში გაფორმებული ხელშეკრულების წყალობით შეძლო. რუსეთსა და ცხინვალის რეგიონს შორის გაფორმებული ხელშეკრულება რუსეთის მოქალაქეებს ნაწილობრივ აღიარებული რესპუბლიკის მთავრობაში თანამდებობების დაკავების უფლებას აძლევს და პირიქით.

რუსეთის პრეზიდენტის ადმინისტრაციასთან დაახლოებულმა წყარომ „მედუზას“ (Meduza) 2022 წელს უთხრა, რომ კრემლი ცხინვალის რეგიონისა და აფხაზეთის რუსეთთან ან რუსეთისა და ბელარუსის სამოკავშირეო სახელმწიფოსთან შეერთების გეგმას „განიხილავდა“. ოსურ არჩევნებზე მომუშავე პოლიტიკურმა კონსულტანტმა „მედუზას“ განუცხადა: „როგორც ჩანს, ისინი მინი-სსრკ-ის იდეის გაცოცხლებაზე ფიქრობენ“. რუსეთის პრეზიდენტის პრესმდივანმა დმიტრი პესკოვმა განაცხადა, რომ ცხინვალის რეგიონში ხელმძღვანელობის შეცვლა რუსეთთან შესაძლო შეერთების ნაბიჯს არ უკავშირდება.

საქართველო ცხინვალის რეგიონსა და აფხაზეთს რუსეთის მიერ ოკუპირებულ ტერიტორიებად მიიჩნევს, იქ ჩატარებულ არჩევნებს კი უკანონოდ ცნობს. საქართველოს საგარეო საქმეთა სამინისტრომ განაცხადა: „საქართველოს ოკუპირებულ ტერიტორიებზე სამხედრო ოკუპაციისა და რუსეთის ფედერაციის ეფექტიანი კონტროლის პირობებში ნებისმიერი ეგრეთ წოდებული არჩევნების ჩატარება უკანონოა და საერთაშორისო სამართლის თანახმად ვერანაირ შედეგს ვერ გამოიწვევს, როცა იძულებით გადაადგილებულ პირებსა და ლტოლვილებს საკუთარ სახლებში უსაფრთხოდ და ღირსეულად დაბრუნების შესაძლებლობა არ ეძლევათ“.