თურქეთის ფოლადის ქარხანაში აფეთქებას სულ მცირე 16 ადამიანი ემსხვერპლა

თურქეთის დასავლეთით, ალიაღაში მდებარე ფოლადის ქარხანაში ორშაბათს მომხდარ ძლიერ აფეთქებასა და ხანძარს სულ მცირე 16 მუშა ემსხვერპლა, 13 კი დაშავდა. თურქეთის მთავრობის მონაცემებით, მიმდინარეობს გამოძიება, იყო თუ არა შემთხვევა დაუდევრობით გამოწვეული.

თურქეთის პრეზიდენტმა რეჯეფ თაიფ ერდოღანმა მსხვერპლის შესახებ განახლებული მონაცემების გამოცხადებისას აღნიშნა, რომ აფეთქების გამოძიება გრძელდება და დაუდევრობაში დამნაშავე პირებს გამოავლენენ. ერდოღანმა დაღუპულთა ოჯახის წევრებს მიუსამძიმრა და განმარტა, რომ დაშავებულთაგან ორი მძიმე მდგომარეობაშია.

თურქული მედიის, მათ შორის NTV-ისა და გაზეთ Hürriyet-ის ცნობით, აფეთქებასთან დაკავშირებით ხუთი ადამიანი დააკავეს. გამოცემებს დამატებითი დეტალები არ გაუვრცელებიათ.

მანამდე იზმირის პროვინციის გუბერნატორმა სულეიმან ელბანმა განაცხადა, რომ აფეთქება ადგილობრივი დროით დაახლოებით 12.00 საათზე მოხდა. სარემონტო სამუშაოებისას, ღუმელის შეცვლისა და შეკეთების დროს, ამწით გადაადგილებული სამშენებლო მასალა გაზის მილს დაეცა.

გუბერნატორის თქმით, ქარხნის ამ მონაკვეთში ჩვეულებრივ დაახლოებით 300 ადამიანი მუშაობს, თუმცა დღეს ნაკლები მუშა იყო, რადგან დანადგარებს არემონტებდნენ.

ევროკომისიის პრეზიდენტმა ურსულა ფონ დერ ლაიენმა ორშაბათს თურქეთის პრეზიდენტს მიუსამძიმრა. მან სოციალურ ქსელში დაწერა: „ღრმად დამამწუხრა ალიაღის ფოლადის ქარხანაში მომხდარი აფეთქების ამბავმა. გულწრფელ სამძიმარს ვუცხადებ დაღუპულთა ოჯახებსა და ახლობლებს. დაშავებულ მუშებს სრულ და სწრაფ გამოჯანმრთელებას ვუსურვებ“.

ფონ დერ ლაიენი თურქეთის პრეზიდენტს პირდაპირ მიმართა და ტრაგედიის გამო სოლიდარობა გამოუცხადა. მან დასძინა: „ძვირფასო ერდოღან, ამ მძიმე წუთებში ჩემი ფიქრები თურქეთთანაა“.