უკრაინა: აზიური ჩიპები რუსულ რაკეტებში ხვდება

უკრაინის სანქციების საკითხებში სპეციალურმა წარმომადგენელმა განაცხადა, რომ ნავთობიდან რუსეთის შემოსავლების განახევრების შემთხვევაში, ქვეყანა შესაძლოა ექვს თვეში ომიდან გასვლა აიძულონ. მან აზიის მთავრობებს მოუწოდა, აღმოფხვრან ხარვეზები, რომლებიც რუსულ ნავთობმზიდებსა და იარაღის კომპონენტებს რეგიონში შეუმჩნევლად გადაადგილების საშუალებას აძლევს.

უკრაინის პრეზიდენტ ვოლოდიმირ ზელენსკის სანქციების პოლიტიკის კომისარმა ვლადისლავ ვლასიუკმა სამშაბათს, სინგაპურში ვიზიტისას განაცხადა, რომ სანქციები მოსკოვის სერიოზულ სამშვიდობო მოლაპარაკებებზე დასაყოლიებლად ყველაზე ეფექტიან ბერკეტად რჩება.

ვლასიუკმა სინგაპურში უკრაინის საელჩოში ჟურნალისტებს განუცხადა: „სანქციები მართლაც კარგი საშუალებაა, რათა რუსულ მხარეს საუბრის დაწყება აიძულო. ასევე გვჯერა, რომ სანქციებმა რუსეთის ეკონომიკას უკვე მრავალი სირთულე და შეზღუდვა შეუქმნა და დინამიკა შეცვალა“.

მან დასძინა, რომ „მართლაც გამანადგურებელი სანქციების“ კიდევ ერთმა პაკეტმა შესაძლოა რუსეთი „რთულ მდგომარეობაში“ ჩააყენოს და მომდევნო ექვს თვეში უკან დახევა აიძულოს. ამისთვის ნავთობიდან შემოსავალი, რომელიც მოსკოვისთვის ფულის უმნიშვნელოვანესი წყაროა, სულ მცირე, განახევრებული უნდა იყოს.

ვლასიუკის განცხადებები აზიასთან კიევის კავშირების გაძლიერების ფონზე გაკეთდა. რეგიონს სულ უფრო ხშირად მიიჩნევენ სანქციების სისტემის სუსტ რგოლად, რომელიც აშშ-მა, ევროკავშირმა და დიდი შვიდეულის ქვეყნებმა 2022 წელს რუსეთის შეჭრის შემდეგ შექმნეს.

ინდოეთისა და ჩინეთის ნავთობგადამმუშავებელმა საწარმოებმა ფასდაკლებით გაყიდული რუსული ნედლი ნავთობის უდიდესი ნაწილი შეიძინეს. ამან მოსკოვს ნავთობიდან შემოსავლის შენარჩუნებაში შეუწყო ხელი, მიუხედავად იმისა, რომ დასავლეთის მთავრობებმა ფასის ზედა ზღვრის აღსრულება გაამკაცრეს.

სამხრეთ-აღმოსავლეთ აზიის პორტები და თავისუფალი ვაჭრობის ზონები გემიდან გემზე გადატვირთვის შუალედურ პუნქტებად იქცა. ასეთი გადატვირთვები სანქცირებული რუსული ტვირთების წარმოშობას ფარავს.

ვლასიუკმა განაცხადა, რომ აზიაში ვიზიტისას მალაიზიის, ინდონეზიის, იაპონიისა და ტაილანდის ოფიციალურ პირებთან შეხვედრას გეგმავდა. მხარეებს რუსეთის ე.წ. „ჩრდილოვანი ფლოტი“ და რუსეთის თავდაცვის ინდუსტრიაში მიკროელექტრონიკის მიწოდება უნდა განეხილათ. რუსეთი ამ ფლოტით ნავთობს დასავლურ კომპანიებზე დამოკიდებულების გარეშე გადააქვს და დაწესებულ ფასის ზედა ზღვრებს თავს არიდებს.

სი-ენ-ბი-სის (CNBC) მიერ შესწავლილი დოკუმენტების თანახმად, რაკეტის კომპონენტები ძირითადად აშშ-დან, რუსეთიდან, ჩინეთიდან, ტაივანიდან და იაპონიიდან იყო. რაკეტა გასულ თვეში კიევის რეგიონში ჩამოაგდეს. ეს აჩვენებს, რომ სამ წელზე მეტი ხნის საექსპორტო კონტროლის მიუხედავად, გლობალური მიწოდების ჯაჭვები რუსეთის იარაღის წარმოებაში კვლავ ღრმადაა ჩართული.