უკრაინამ რუსეთის ნავთობგადამამუშავებელი სიმძლავრის 30% მწყობრიდან გამოიყვანა

როიტერსის ცნობით, უკრაინამ ოქტომბრის ბოლოს რუსეთის ნავთობგადამამუშავებელ ქარხნებზე რეგულარული იერიშები განაახლა და დააზიანა საწარმოები, რომელთა წილიც რუსეთის გადამუშავების სიმძლავრის დაახლოებით 30%-ია. სააგენტო ინფორმაციას ინდუსტრიის ორ წყაროზე დაყრდნობით ავრცელებს.

იერიშები განახლდა მას შემდეგ, რაც აშშ-ის პრეზიდენტ დონალდ ტრამპის მიერ გამოცხადებული ენერგეტიკული ზავი დაირღვა. გასული კვირის განმავლობაში დარტყმებმა შეფერხება გამოიწვია რუსეთის 35 უდიდესი ქარხნიდან ცხრაში, მათ შორის რიაზანისა და იაროსლავლის ქარხნებში, ასევე ვოლგის რეგიონში. როიტერსის წყაროების შეფასებით, ეს საწარმოები რუსეთის ნავთობგადამუშავების სიმძლავრის დაახლოებით მესამედს შეადგენს.

როიტერსის ცნობით, რუსეთს დღეში 930 000 მეტრული ტონა ნედლი ნავთობის გადამუშავება შეუძლია. თუმცა, ოქტომბრის ბოლოს მისი ქარხნები დღეში მხოლოდ დაახლოებით 700 000 მეტრულ ტონა ნედლ ნავთობს ამუშავებდნენ.

როიტერსის ცნობით, უკრაინის დარტყმები ნავთობგადამამუშავებელ ქარხნებზე ქვეყანაში საწვავის დეფიციტს ამძიმებს. ამას ემატება ისიც, რომ რუსეთი ტრამპთან გაფორმებული საექსპორტო შეთანხმების ფარგლებში დიზელის საწვავს საზღვარგარეთაც აგზავნის.

ამასობაში, როგორც ჩანს, რუსული დიზელის აშშ-ში გადამზიდმა ტანკერებმა მყიდველები ვერ იპოვეს. გასულ კვირას ორმა გემმა, „ტალისმანმა“ და „ლერუმ“, კურსი შეცვალა. სამშაბათს გავრცელდა ინფორმაცია, რომ აშშ-ისკენ მიმავალმა კიდევ ერთმა გემმა, „აგიოი ფანენდესმა“, უკან გაბრუნება დაიწყო.