უკრაინამ რუსეთში Ozon-ის საწყობსა და ნავთობგადამამუშავებელ ქარხანას დაარტყა

როსტოვის გუბერნატორმა იური სლიუსარმა განაცხადა, რომ 15 სექტემბრის ღამეს უკრაინული დრონები და რაკეტები ტაგანროგს დაესხნენ თავს. დარტყმის შედეგად სავაჭრო პლატფორმა Ozon-ის კუთვნილი საწყობი დაზიანდა. ასევე დაზიანდა რამდენიმე საცხოვრებელი შენობა, მაღაზია და ადმინისტრაციული შენობა. გუბერნატორის თქმით, თავდასხმის შედეგად არავინ დაშავებულა.

Ozon-მა განაცხადა, რომ სარაკეტო საფრთხის გამო ტაგანროგში მისი ლოჯისტიკური პარტნიორის სადისტრიბუციო ცენტრიდან ადამიანების ევაკუაცია განხორციელდა. კომპანიის თქმით, ცენტრს გამყიდველების საქონელი „საერთოდ არ მიუღია“. Ozon-მა დასძინა, რომ ცენტრი „სხვა ოპერაციებს ასრულებს“.

უკრაინული მონიტორინგის პროექტ Exilenova+-ის ცნობით, დარტყმის ერთ-ერთი სამიზნე ბერიევის სახელობის ტაგანროგის საავიაციო სამეცნიერო-ტექნიკური კომპლექსი (G.V. Beriev Taganrog Aviation Scientific and Technical Complex) იყო. ეს საწარმო სამხედრო თვითმფრინავებს არემონტებს და აახლებს.

უკრაინული დრონები რუსეთის სამარის რეგიონსაც დაესხნენ თავს. გუბერნატორმა ვიაჩესლავ ფედორიშჩევმა განაცხადა, რომ თავდასხმის შედეგად ერთი სამრეწველო ობიექტი დაზიანდა. მას მომხდარის შესახებ დამატებითი დეტალები არ დაუკონკრეტებია. დამოუკიდებელი Telegram-არხ Astra-სა და უკრაინული მონიტორინგის არხების ცნობით, დარტყმის სამიზნე როსნეფტის სიზრანის ნავთობგადამამუშავებელი ქარხანა იყო.

აშშ-ის პრეზიდენტმა დონალდ ტრამპმა 14 სექტემბერს განაცხადა, რომ უკრაინა რუსეთის ენერგეტიკულ ინფრასტრუქტურაზე თავდასხმების შეწყვეტას დათანხმდა. ტრამპის თქმით, რუსეთიც თითქოს იმავეს დათანხმდა. უკრაინის პრეზიდენტმა ვოლოდიმირ ზელენსკიმ ასეთი შეთანხმებისთვის უკრაინის მზადყოფნა დაადასტურა, თუმცა ეჭვი გამოთქვა, რომ რუსეთი პირობას შეასრულებდა. ფაინენშალ ტაიმსის წყაროების თქმით, ტრამპმა ენერგეტიკული ზავის გამოცხადება იჩქარა.